بلخ کې د سوداګرۍ او پانګونې خونې مسوولين وایی چې له ازبیکستان سره پر پوله پروت حيرتان سوداګريز بندر کې تجارتي راکړه ورکړه بيا پیل شوې ده.
د بلخ د سوداګرۍ خونې اجرايي مرستيال محمد حسن انصاري شمشاد ته وویل چې اوس مهال له ازبیکستان څخه خوراکي او نور اړتيا وړ توکي د موټرو او کښتيو په وسيله واردېږي او ژر به د اوسپنې پټلۍ سوداګريزه لار هم بيا ځلي پرانیستل شي.
هغه وویل: «حيرتان بندر د وارداتو او صادراتو پر مخ پرانیستی دی. اوسمهال واردات د موټرو او کښتيو په وسيله ترسره کېږي، چې ډېری واردات يې ارتزاقي مواد دي. په مقابل کې له دې طرف نه هم موږ صادرات درلودل په تېرو دوه ورځو کې. خو لا هم د اوسپنې پټلۍ له لارې تجارتي راکړه ورکړه نه ده پیل شوې.»
