د فرانسې د بهرنیو چارو وزارت چارواکو ویلي، نه غواړي تر ډېره په افغانستان کې پاتې شي او په درې ورځو کې به د خپلو ځواکونو د ایستلو لړۍ بشپړه کړي، خو په خبره یې دغه چاره تر ډېره د امریکا په ماموریت پورې تړلې ده.
یادو چارواکو زیاته کړې، که امریکا د خپلو ځواکونو د وتلو نېټه غځوي، نو دوی به هم په ارام زړه د ویستلو لړۍ پای ته ورسوي.
که څه هم له برتانیا وروسته فرانسې په افغانستان کې د بهرنیو ځواکونو د اوسېدو مودې د غځېدو غوښتنه کړې وه، خو د طالبانو له رد سره ټول د اګست تر ۳۱ مې وځي.
له بل لوري د هغو امریکایي ځواکونو د وتلو اړۍ هم پیل شوه، چې د کابل هوایي ډګر امنیت خوندیتوب په موخه راغلي وو.
د غربي رسنیو د راپور له مخې، امریکا خبر ورکړی، چې د خپلو ځواکونو د بېرته اېستلو لړۍ یې پیل کړې ده.
ویل کېږي، د امریکا په سیاست کې تغیر راغلی او یوازې خپل اتباع له افغانستانه وباسي، نه هغه افغانان چې اوس د میدان په شاوخوا کې راټول دي.
امریکایي چارواکو ویلي، وضعیت نازک او وخت لنډ دی او د نورو افغانانو ایستلو پروسه پېچلې ده، چې دوی نه شي کولی ټولو ته رسېدنه وکړي.
هغوی ویلي، یوازې دومره کولی شي چې خپل اتباع له افغانستان بېرون کړي.