Skip to content
که څه هم د تېرو ورځو پرتله په کابل ښار کې وضعیت اوس بېرته په ښه کېدو دی،خو زیات خلک له اقتصادي بحران په وېره کې دي.
د هوټلونو مسوولین وايي،د دوه اوونۍ وړاندې پرتله يې پېرېدونکي دوه برابره کم شوي دي.
د کابل ښار یوه هوټل پخوونکی:« شکر بازار ښه دی، خو هغاسې نه دی،لکه وړاندې چې وه. حکومت بدلون کړی دی،نو له همدې امله بازارونه یو څه ګمرنګه شوي. »
د تُندو او ترسکونو خوراکونو بازار اوس هغسې نه دی،چې څو اوونۍ وړاندې وو، اوس یوازې د پلازمېنې یوشمېر کسان په هوټلونو کې ډوډۍ خوړلو ته زړه کوي.
د کابل ښار یوه هوټل پخوونکی:« د کابل خلک وړاندې هوټل ته ډېر راتلل. له ولایتونو هم خلک هوټل ته راتلل،خو د نظام په بدلون سره مو پېرېدونکي کم شوي دي.»
يوازې يو هوټل چې موږ ترې رېپورټ جوړ کړی، له درېیو برخو يې يوازې يوه برخه پلورل کېږي،چې ورسره د دومره زيات شمېر کارکونکو په معاشونو هم تاثير لري.
د هوټل مدير وايي:« موږ وړاندې پسونه درې ځلې ۱۲ دانې راغوښتل،چې ټول ۳۶ دانې کېدل. موږ اوس یوازې یوازې یو ځل یې راغواړو. هېله شته،چې حالت به ښه شي او بېرته زیات کړو.»
له کله چې طالبانو پلازمېنه نيولې،د ژوند په ټولو اړخونو کې بدلون راغلی، د دوی په راتګ لومړۍ ورځې خورا سختې اما کرار کرار هرڅه په عادي کېدو دي،خو خلک له اقتصادي بحران زياته وېره لري،چې ګوندې طالبان به يې ژر مخه ونه شي نیولی.
