مجاهد: د تېر حکومت کارکوونکي دې بېرته کارونو ته ستانه شي

د اسلامي امارت د ارشاد او دعوت کمیسیون غړو په کابل کې د دوشنبې پر ورځ د « ۱۴۰۰ کال د وږي پر ۲ مه»  له  دیني علماوو سره ناسته وکړه. 

د طالبانو ویاند ذبیح الله مجاهد ناسته کې د خبرو پر مهال وویل، د تېر حکومت ټول کارکوونکي دې بېرته کارونو ته راوګرځي او ژمنه یې کړې،چې د دوی له خوا به له کومې ستونزې سره نه مخ کېږي.

مجاهد زیاته کړه:« عالمان باید خلکو ته ډاډ ورکړي،چې راتلوونکی حکومت به د ټولو وي. د یوه قشر به نه وي. ټول خلک دې هېله ولري، چې کوم نظام راځي، د خلکو خدمتګار به وي.»

طالب ویاند هغه ګنګوسې هم رد کړې،چې ګواکې له هېواد نه وسلې او پوځي او وسایط قاچاق کېږي او یا د خلکو لوڼې په زور په نکاح کېږي.

هغه د یو موټي او متحد افغانستان لپاره ټینګار وکړ چې ګوندي، ژبني او مذهبي توپیرونه دې یوې خوا ته کېښودل شي او ټول دې د افغانانو په نوم سره راټول شي.

دې طالب چارواکي د راتلونکې نظام په اړه له علماوو غوښتنه وکړه چې خلکو دې د نظام ملاتړ ته وهڅوي.

مجاهد زیاتوي:« خپلو خلکو ته باید   له اسلامي نظام سره د  درېدلو او ملاتړ په اړه تلقین ورکړو، ترڅو خلک نور په وېره او اضطراب کې پاتې نه شي.» 

په ورته وخت کې  دیني عالمان له طالبانو  د یو ټول شموله حکومت جوړېدو غوښتنه کوي.

دیني عالمان وايي، د طالبانو په واکمن کېدو سره ټول هېواد کې سوله تامين شوې او په اوسني وضعیت کې د جګړې بیا پیل لپاره هره هڅه بغاوت بولي.

ذبیح اله مجاهد وویل، د هېواد اقتصاد پیاوړتیا لپاره ځانګړې او جامع برنامې لري،چې په پلې کولو  سره به یې د هېواد او خلکو اقتصاد پیاوړي شي.

 هغه د ټاپي په څېر لویې اقتصادي پروژې اړینې یادې کړې او زیاته یې کړه،چې افغانستان د منځنۍ او سویلي اسیا هېوادونو ترمنځ د وصل لاره ده .