افغانستان کې د طالبانو له راتګ سره سم د نورو توکو ترڅنګ د تېلو په بیو کې د پام وړ زیاتوالی راغلی.
ویل کېږي، چې د یو ټن تېلو بیه له ۹۰۰ ډالرو هم پورته شوې ده.
د ایران د تېلو او پټرولیم د صادراتو ټولنې ویلي، د طالبانو د غوښتنې له مخې یې افغانستان ته د تېلو صادرات پیل کړي دي.
د رویټرز خبري اژانس د راپور له مخې، طالبانو ایران ته یو پیغام استولی و او په هغه کې یې غوښتنه کړې وه، چې افغانستان ته د اړتیا وړ تېل او ګاز راولېږي.
ویل کېږي، طالبانو د تېلو پر وارداتو تعرفې تر اویا سلنې را کمې کړې دي، چې ورسره به د تیلو په بیو کې ټیټوالی هم راشي.