ناټو له افغانستان سره خپلې مرستې وځنډولې

د ناټو غړو هېوادونو بهرنیو چارو وزيران وايي، د روانو شرايطو له امله يې له افغان چارواکو سره خپلې ټولې مرستې ځنډولې دي.

دوی  افغانستان کې پر ټولو غاړو غږ وکړ،چې د یوه ټول شموله حکومت د جوړولو لپاره دې کار وکړي.

د یاد سازمان غړو هېوادونو د بهرنيو چارو وزيرانه وايي، افغانستان کې هر راتلونکی حکومت بايد نړيوالو مکلفيتونو ته غاړه کېږدي.

د دوی غوښتنه دا ده،چې  د ښځو  او لږکيو په ګډون ټول په کې برخه ولري او افغانستان بيا هېڅکله د ترهګرو لپاره د خوندي پټن ځای په توګه ونه کارول شي.

د یاد سازمان له لوري په خپره شوې خبرپاڼه کې راغلي،چې له طالبانو غوښتل شوي،له کابله د بهرنيو وګړو او هغو افغانانو ته چې غواړي له دې هېواده ووځي، د وتلو اجازه ورکړي.

د خبرپاڼې یوه برخه:« موږ په افغانستان کې له هغو کسانو،چې په واک کې دي،غوښتنه کوو،چې کابل کې د حامد کرزي هوايي ډګر په ګډون د دوی د خوندي او منظم اېستلو درناوی وکړي او اسانتياوې ور برابرې کړي.»

اخوا د  د سیاسي چارو تحلیل کوونکي بیا وايي٬ نړیوال د خپلو غوښتنو لپاره،چي په طالبانو باندي یې ومني،همدا د مرستو وروستۍ بسته ده،چې غواړي پر طالبان فشار راولي.

د سیاسي چارو تحلیل کوونکی شعور نیازی وايي:«  دا جوته ده،چې خامخا به نړیوال د دې لپاره،چې خپلې پروژې، اهداف، د خپلو ګټو لپاره خپلې پرېکړې د ا فغانستان پر چارواکو او په ځانګړې توګه په طالبانو ومني. دوی په لاس کې همدا یوه وسله ده،کومې مرستې چې کوي، دوی به ګواښوونه کوي،چې دا مرستې بندوو او یا به یې پر رېښتیا د یو څه مودې لپاره بندې کړي،ترڅو هغه څه چې دوی غواړي، افغان چارواکي ورته غاړه کېږدي او وې  ومني.» 

بل پلو ځینې نور بیا وايي،دا مهال افغانستان له ستر اقتصادي بحران سره مخ دی او د نړیوالو د مرستو جلبولو لپاره باید هڅې وشي،ترڅو افغانان له اقتصادي ستونزو سره مخ نه شي.

ناټو ویلي،سملاسي دنده دا ده،چې خپل وګړي او هغه کسان چې له ګواښ سره مخ دي او په ځانګړې توګه  يې،چي  مرسته کړې له افغانستانه وباسي.