د ننګرهار اوسېدونکی شرافت شریفي له تېرو درېیو کلونو راهيسې له پاکستان د بېلابېلو څارويو نسلونه را واردوي.
دی وايي، له دې کاره يي موخه د شخصي کاروبار ترڅنګ په افغانستان کې د يادو څارويو د نسل زياتول او ترويج دی.
د شريفي په خبره، که سرپرست حکومت په ګمرکونو کې اسانتیاوې زياتې کړي، چمتوو دی چې له پاکستان سربېره له ایران، جرمني او یو شمېر نورو هېوادونو هم د څارويو نسلونه افغانستان ته وارد کړي.
شریفي زیاتوي: « اراده لرو چې له ایران هم کار پيل کړو او ورسره خبرې روانې دي له آلمان غواګانې، الفین او سینین وزې را واردې کړو. له حکومت غوښتنه کوو چې باید له موږ سره په دې خاطر مرسته وکړي چې دا افغانستان ته ګټه ده. موږ کوم قاچاقي شی نه راوړو، بلکې دا مالداري ده چې څومره ډېرېږي، د خلکو ژوند ورسره ښه کېږي او اقتصاد لوړېږي. دا سمه ده چې موږ هم دا کار د ګټې لپاره کوو، خو عامو خلکو ته یې ګټې ډېرې دي. دوی یې شیدې او غوښې خوري او نورې ګټې ترې اخلي.»
شریفي وايي، اوسمهال د بېلابېلو څارويو ترڅنګ د پاکستاني وزو نسلونه په افغانستان کې ډېر خوښوونکي لري او له همدې کبله يو شمېر مالداران هم د يادو وزو د نسل زياتوالي لپاره، سوداګرو ته د ګمرکي اسانتياوو رامنځته کېدو غوښتنه کوي.
د خان آغا په نوم یو تن مالدار په دې اړه وايي: « زموږ له حکومت غوښتنه دا ده هغه څوک چې د مال کاروبار کوي او له پنجاب یې راولي، په لارو او ګمرکونو کې همکاري وکړي، ترڅو مالونه په ګمرک کې ډېر ونه ځنډېږي او پر وخت سره هېواد ته راورسېږي او په نورو خلکو وپلورل شي. »
بله خوا، د کرنې، اوبو لګولو او مالدارۍ وزارت چارواکي وايي، سرپرست حکومت په ټولو برخو کې سوداګرو او پانکوالو ته اسانتیاوې رامنځته کړې او لا هم په دې برخه کې هڅې دوام لري.
د دوی په خبره، په دې وروستیو کې د څارویو روزلو فارمونه زیات شوي او خلکو ترې ښه ګټه اخيستې ده.
د کرنې ترڅنګ مالداري د افغانانو لپاره د عوایدو لویه سرچينه ده او بېلابېل څاروي د شیدو، غوښو، وړیو، پوستکو او نورو محصولاتو په موخه ساتي.
که څه هم مالداري په افغانستان کې لرغونې مخينه لري، خو اوس دغې برخې د خپل ارزښت له امله د يوه صنعت حيثيت خپل کړی.
