که څه هم په افغانستان کې د پاکستان ضد وسله والو ډلو د شتون او د دې هېواد امنیت او ثبات پر وړاندې یې کارولو په تړاو د پاکستاني چارواکو څرګندونې نوې خبره نه ده؛ خو دا ځل د دې هېواد بهرنیو چارو وزارت په جدي خبرداری ورکړی.
د پاکستان اېکسپرېس ټرېبیون ورځپاڼې د دغه هېواد د بهرنیو چارو وزارت ویاندې له قوله لیکلي چې نوموړې په خپل وروستي خبري کنفرانس کې یو ځل بیا ویلي چې د پاکستان ضد وسله والې ډلې له افغان خاورې د پاکستان پر وړاندې عملیات ترسره کوي.
ممتاز زهرا بلوچ د خبرداري په بڼه ویلي، اسلامي امارت باید د دوی اندېښنې جدي ونیسي او له دې زیات باید د پاکستان د خلکو زغم ونه ازمايي.
ورځپاڼې د زهرا بلوچ له خولې لیکلي: « افغانستان باید اجازه ورنه کړي چې خاوره یې د ترهګرۍ په موخه د پاکستان او بل هر ګاونډي پر وړاندې وکارېږي. د هغو ګواښونو په تړاو چې موږ تل په افغانستان کې د بنسټونو او افراد له لوري ورسره مخ یو، د پاکستان د خلکو زغم باید ونه ازمویل شي.»
ممتاز زهرا بلوچ ادعا کړې چې د پاکستان ضد وسله والې ډلې د هند له خوا تمویل او د دې هېواد پر وړاندې کارول کېږي.
اسلامي امارت د پاکستان دغه څرګندونې ردوي او هلته روانه ناامني د دې هېواد کورنۍ مساله بولي.
د اسلامي امارت مرستیال ویاند وايي، سرپرست حکومت هېچا ته اجازه نه ورکوي چې افغان خاوره د نورو پر ضد وکاروي.
د اسلامي امارت مرستیال ویاند حمدالله فطرت زیاتوي: « دا ادعاوې موږ په کلکه ردوو، دا ډول موضوعات په موږ پورې اړه نه لري. اسلامي امارت چاته اجازه نه ورکوي چې د افغانستان خاوره د نورو پر خلاف وکاروي. افغانستان نور د هېچا پر وړاندې تهدید نه دی. پاکستان دې خپل مسوولیتونه زموږ پر غاړه نه را اچوي او خپلو ستونزو ته دې په کورد ننه حل پیدا کړي.»
د سیاسي چارو شنونکي هم په ورته موضوع کې بار بار د پاکستاني چارواکو دغه ډول څرګندونې ردوي او زیاتوي چې پاکستان تل د وسله والو ډلو له روزلو، پاللو او صادرولو ګټه پورته کړې او له دې لارې یې خپل سیاسي او سټراتيژیک رقابتونه مخ ته وړي.
د سیاسي چارو شنونکی فیضمحمد ځلاند وايي: « پاکستان تل د ترهګرۍ له روزنې او پالنې د خپلو ستراتیژیکو موخو ترلاسه کولو لپاره کار اخیستی. د پاکستان له پیدایښت راهیسې په سیمه کې ترهګري پالل کېږي، ترهګري روزل کېږي او ترهګري صادرېږی. د افغانستان د خاورې، ولس او اوسنیو چارواکو پر ضد د پاکستان هر ډول ادعا زما په اند هېڅ ډول اسناد نه لري، بابېزه او خاص د پاکستان د مداخلي او لارې هوارولو لپاره دي.»
د سیاسي چارو کارپوه حکمتالله حکمت وايي: « د افغانستان له جغرافیا په تېر کې، نن او په پوره باور سره سبا هم د پاکستان لپاره هېڅ ډول تهدید وجود نه درلود، نه یې لري او نه به یې ولري.»
له دې وړاندې، د بلوچستان کوېټې ښار ریلګاډي په تم ځای کې پر پوځیانو له یوه مرګوني برید وروسته د دې هېواد دفاع وزیر خواجه اصف هم ورته څرګندونې وکړې. هغه څه چې سرپرست حکومت یې په کلکه ردوي.
