د کابل هوايي ډګر لا هم عادي حالت ته نه دی ګرځېدلی

د حامد کرزي نړیوال هوايي ډګر ته سلګونه عام خلک ننوتي او غواړي له هېواده پښې وباسي.

هوايي ډګر کې ډزې هم شوي دي او تر اوسه یو شمېر کسانو ته مرګ ژوبله هم اوښتې ده.

له بل لوري د امریکا هوایي ځواک د ځانګړو پلټنو ادارې ویلي، دوی به د هغو پروازونو په تړاو جدي پلټنې وکړي، چې ملکي مرګ ژوبله په کې اوښتې ده.

یادې ادارې ویلي، د امریکا د هغه الوتکې له مامورینو یې پلټنې پيل کړي، چې د پرواز پر مهال یې خلک پر الوتکې پسې نښتي وو، خو دوی خپل پرواز ته ادامه ورکړې ده.

بلخوا په کابل هوايي ډګر کې طالب چارواکي بیا وایي، چې په وروستیو ورځو کې په دغه ډګر کې څلوېښتو کسانو ته مرګ ژوبله اوښتې ده.

دوی له خلکو غوښتي، چې له هوايي ډګر هر ډول ملکي پروازونه ځنډېدلي او له وېزې، پاسپورټ او ټکټ پرته دې خلک دغه ډګر ته مراجعه نه کوي.