پر وسله والو ډلو باندې د بریدونو د زیاتوالي له امر سره سم ملي دفاع وزارت په ټول هېواد کې عملیات پراخ کړي دي.
ملي دفاع وزارت وایي، طالبان به یا په سختو عملیاتو وځپي او یا به یې سولې ته اړ کړي.
له دې سره د ولسي جرګې رییس هم له دې پریکړې هر کلی کړی چې طالبان تر فشار لاندې ونیول شي چې سولې ته لیواله شي.
پوځي کارپوهان بیا انديښنه لري چې د عملیاتو له پراخوالي سره یو ځای افغان ځواکونه په کشفي برخه کې کمزروي او تجهیزات کم لري چې بریا یې حتمي نه ده.
له وسلوالو طالبانو سره د سولې د خبرو په جریان کې په افغان امنیتي ځواکونو د امنیت شورا غږ دا و چې د خلکو د امنیت او ارامښت لپاره باید په ټول هېواد کې یرغلیز بریدونه زیات شي.
اوس دفاع وزارت کار کوي چې د جګړې په ډګر کې د وسلوالو د ماتولو لپاره امر پرځای کړي.
د جګړې په میدان د وسلوالو د بریا یو راز همدا دی، چې د افغان حکومت پر وړاندې په یرغلیز حالات کې دي او له دې ښکاري چې د جګړې ابتکار د وسلوالو په لاس کې دی چې غزني په کې سقوط شو او فراه کې جګړه تر ښاره ورسېده.
په ولسي جرګه کې غوښتنه دا وه چې په وسلوالو طالبانو باندې باید فشار زیات شي ترڅو د جګړې له لارې سولې ته اړ کړای شي.
ولسمشر غني څو ځله له افغان امنیتي ځواکونو غوښتي وو، چې له دفاعي حالات ووځي او وسلوالو باندې یرغلیز بریدونه وکړي خو لیدل کېږي چې تر اوسه پورې افغان امنیتي او دفاعي ځواکونه د دفاع په حال کې دي.
د جګړې کارپوهان یې لاملونه د ښو وسلو نه شتون او د طالبانو کارنده استخباراتي پلان دی چې طالبان پکې برلاسي ښکاري.
خو تل اندېښنې داوي چې په جګړه کې ښکیلې خواوې د جګړو پرمهال د خلکو ژوند ته پام نه کوي چې له امله یې په ډېر شمېر ولسي خلکو ته درنه مرګ ژوبله اوړي.
