له شپږم ټولګي پورته نجونې د ښوونځیو پرانیستلو غوښتنه کوي

د اسلامي امارت له بیا ځل واکمنېدو وروسته، تر شپږم ټولګي پورته د نجونو پرمخ ښوونځي تر امرثاني پورې وتړل شول.

د پوهنې وزارت له دې پرېکړې یو کال وروسته؛ د لوړو زده کړو وزارت هم د ښځینه محصلینو زده کړې وځنډولې او دغه راز یې نجونو ته د کانکور په ازموینه کې د ګډون حق ورنه کړ.

دغو پرېکړو د هغو زرګونو نجونو هیلې په مأیوسۍ بدلې کړې چې غوښتل یې په بېلابېلو برخو کې لوړې زده کړې وکړي.

فاطمه د دولسم ټولګي زده کوونکې وه چې د نجونو ښوونځي وتړل شول. نوموړې وايي، غوښتل یې ډاکټره شي خو له درېيو کلونو راهيسې په کور کې پاتې ده او راتلونکي ته هېڅ هيله نه لري.

فاطمه وايي: « له حکومت مې غوښتنه دا ده چې د نجونو پرمخ د زده کړو دروازې خلاصې کړي، ترڅو زما په څېر هغه نجونې چې په کور ناستې دي، له خپلو زده کړو لرې دي، هیلو ته نه شي رسېدای، زده کړو ته ادامه ورکړي. دوی باید خپلو هیلو ته ورسېږي او وکولی شي په راتلونکي کې هغه څانګه چې دوی غواړي زده کړې په کې وکړي او هېواد ته د خدمت جوګه شي.»

په ورته وخت کې، یو شمېر زده ‌کوونکې او زده کړیالانې له سرپرست حکومت غواړي د هېواد په پرمختګ  کې د ونډې او باثباته راتلونکي لپاره، دوی ته هم د عصري زده کړو اجازه ورکړي.

یوه له زده کړو پاتې زده کوونکې وایې: « که چېرې نوی نسل او افغانې نجونې نالوستې پاتې شي، دا کار ښايي د افغانستان راتلونکي لپاره ډېر خطرناک وي؛ ځکه چې کله د یوې کورنۍ مور نالوستې وي، ښايي د دې کورنۍ ماشومان هم بې سواده ستر شي. له اسلامي امارت غوښتنه لرم چې ژر تر ژره د ښوونځیو دروازې د نجونو پرمخ خلاص کړي؛ ترڅو زموږ پر وړاندې د جهل او ناپوهۍ خنډونه له منځه لاړ شي.»

همدارنګه یوه زده کړیاله وايي: « په تېرو دوو کالو کې چې کله پوهنتونونه د نجونو پرمخ تړلي وو، ښکاره خبره ده چې د نجونو پر روح او روان یې منفي اغېز درلود.  د نجونو هغه ټول خوبونه په اوبو لاهو شول چې غوښتل یې لوړې زده کړې وکړي او یوه ځای ته ځان ورسوي. دا یو داسې حالت دی چې انسان یې په اړه فکر هم نه شي کولی.»

که څه هم اسلامي امارت په دې اړه تازه څه نه دي ویلي، خو له دې وړاندې یې څو ځله ویلي چې د مناسب چاپېریال او د زده کړو د څرنګوالي په تړاو د یوې طرحې په جوړولو باندې کار کوي؛ ترڅو له مخې یې د نجونو پر مخ د ښوونځیو او پوهنتونونو دروازې بېرته پرانیزي.

د چارو کارپوه محمد سلیم پیګیر وايي: « له اقتصادي، سیاسي او ټولنیز پلوه د افغان وګړو د ټولو ستونزو یوازینۍ حل لاره، یوازې او یوازې ښوونځی دی او پوهنتون دی. هرڅومره چې یوه افغانه مور لوستې او باسواده وي، په همدې اندازه به یې اولادونه هم لوستي وي. نو، هرڅومره ژر چې وي، د ښوونځیو او پوهنتونو دروازې دې خلاصې شي او ښځو ته دې  کار زمینه برابره شي. دغه کار به له اقتصادي، سیاسي او اجتماعي پلوه د پام وړ پرمختګونه راوړي.»

دا په داسې حال کې ده چې تر شپږم ټولګي پورته د نجونو ښوونځيو له تړل کېدو ۱ زره ۱۵۲ ورځې تېرېږي او دغه راز د نجونو پرمخ د پوهنتونونو له تړل کېدو هم ۶۹۳ ورځې اوړي؛ خو تراوسه د یادو وزارتونو چارواکو په دې تړاو وضاحت نه دی ورکړی چې امرثاني به تر کله ادامه ولري.