د امریکا بهرنیو چارو وزیر انټوني بلېنکن ویلي،افغانستان کې د بدلېدونکي امنیتي وضعیت له کبله کابل کې یې خپل سفارت د دې ښار هوایي ډګر ته لېږدولی دی.
په ورته مهال د امریکا سفارت امریکایي وګړو ته خبرداری ورکړی دی،چې ځانونه خوندي ځایونو ته ورسوي.
امریکایي چارواکو منلې ده،چې کابل کې د امریکا سفیر راس وېلسن د سفارت له ودانۍ اېستل شوی او د کابل هوایي ډګر ته لېږدول شوی دی.
د امریکا د بهرنیو چارو وزیر ویلي،د هغو کسانو لېست لري چې باید وژغورل شي او د دې چارې لپاره به خپلې هڅې لا چټکې کړي.
اخوا د دفاع وزیر لویډ آسټن بیا په تازه څرګندونو کې ویلي، دوی د کابل له هوایي ډګر د ديپلوماتانو خوندي اېستلو او په دغه ډګر کې د نظم ساتلو لپاره خپل زر تنه نور ساتونکي هم ځای پر ځای کړي دي
په امریکا کې دننه ګڼو سیاستوالو له افغانستانه د پوځيانو پر اېستلو سختې نیوکې کړې دي او دا یې د ولسمشر جو بایډن لویه ناکامي بللې.
د امریکا پخواني ولسمشر ډونالډ ټرمپ ویلي، اوس د دې وخت دی،چې جو بایډن د هغه څه له امله چې په افغانستان کې یې د پېښېدو اجازه ورکړې،باید په ټیټو سترګو باندې استعفاء ورکړي
په ورته مهال پرون شپه سلګونه ملکیان د حامد کرزي نړیوال هوایي ډګر ته ورغلي وو او له افغانستانه د وتلو غوښتنه یې کوله.