د روسیې ټاس خبري آژانس راپور ورکړی چې د خپلواکو هېوادونو ګډو ګټو سازمان سرمنشي سرګي لبدوف د دې سازمان غړیو هېوادونو د ملي امنیت په عمومي ناسته کې د دغو هېوادونو د ثبات له هغې طرحې ملاتړ کړی چې پر بنسټ یې له افغانستان سره پر پوله امنیتي کمربند جوړیږي.
راپور کې د لبدوف له قوله ویل شوي، د امنیتي کمربند له جوړېدو سره به د نړیوالو ترهګریزو سازمانونو فعالیتونه، د وسلو او نشه یي توکو قاچاق او د غیر قانوني کډوالۍ مخه ونیول شي.
هغه په دې اړه ویلي:« موږ هیله لرو چې د دې امنیتي کمربند په جوړېدو سره به د نړیوالې ترهګرۍ، نشه يي توکو او وسلو د قاچاق او ناقانونه کډوالۍ فعالیتونه شنډ شي.»
د خپلواکو هېوادونو د ګډو ګټو په سازمان کې د روسیې، آذربایجان، ازبېکستان، بېلاروس، تاجیکستان، قرغېزستان، قزاقستان، ارمنستان او مولدوا په ګډون، ۲۵ هېوادونه غړيتوب لري.
له افغانستان سره پر پوله د یادو هېوادونو ګډ امنیتي کمربند جوړولو لپاره دغه وړاندیز لومړی ځل د تاجیکستان ولسمشرامام علي رحمان کړی و.
نوموړي دوه کاله وړاندې د دې سازمان د امنیتي همکاریو ګډې ناستې ته ویلي وو چې له نړیوالۍ ترهګرۍ د خوندیتوب لپاره دې له افغانستان سره پر پوله امنیتي کمربند جوړ شي.
افغانستان په شمال کې د مرکزي آسیا له درېیو هېوادونو ترکمنستان، ازبېکستان او تاجیکستان سره ګډه پوله لري.
د سیاسي چارو کارپوهان وايي، له نړیوالې ترهګرۍ، نشه یي توکو او کډوالۍ سره مبارزه د نړیوالې ټولنې او یاد سازمان غړیو هېوادونو ګډ کار دی.
د دوی په خبره، د مرکزي آسیا هېوادونه دې له دغو ننګونو سره د مبارزې لپاره له سرپرست حکومت سره همکاري وکړي.
د سیاسي چارو کارپوه نجیب الرحمن شمال وايي: « له دې امله چې ترهګرۍ سره مبارزه یوازې د افغانستان دنده نه ده او په یوازې توګه بریالی کېدای هم نه شي، زه هیله لرم چې د ګډو ګټو هېوادونه له ترهګرۍ سره په خپله ګډه مبارزه او دغه راز د نشه يي توکو او انسان له قاچاق سره په مبارزه کې د افغانستان له اوسني سرپرست حکومت سره همکاري او ګډ اقدام وکړي؛ ترڅو هم افغانستان او هم د سیمې هېوادونه د بشري له دې ستر دوښمن یانې تروریزم نجات پيدا کړي، سوله او ثبات افغانستان او د سیمې هېوادونو ته را وګرځي.»
د پوځي چارو کارپوه اسدالله ندیم وايي:« دا یوه ګران بیه مساله ده او دواړو لورو ته دا ښيي چې باید یو پر بل اعتماد ونه کړي او یو د بل ترمنځ امنیتي پوستې او تأسیسات جوړ کړي. غوره به دا وي چې د طالبانو حکومت له دغو هېوادونو سره خبرو ته کېني، د هغوی اندېښنې له نیږدې واوري او هڅه وکړي دغه اندېښنې رفع کړي. طالبان باید داسې زمینه برابره نه کړي چې دغه هېوادونه د افغانستان پر پوله نظامي تأسیسات جوړ کړي.»
دا په داسې حال کې ده چې د اسلامي امارت سرپرست حکومت چې تل یې په افغانستان کې له ترهګرۍ، د نشه یي توکو له کښت او قاچاق سره په جدي مبارزې ټینګار کړی وايي، د اسلامي امارت له واکمنېدو راهیسې هېڅ هېواد ته له افغان خاورې د ترهګرۍ ګواښ نه دی پېښ شوی.
