له طبیعي پېښو سره د مبارزې لپاره د چمتوالي ملي ادارې په کابل کې له ۵۰۰ سېلاب ځپلو کورنیو سره د خوراکي توکو مرسته وکړه.
د یو شمېر هېوادونو په دغو بلاعوضه مرستو کې اوړه او وریجې شامل دي او اړمنو کورنیو ته له پېښو سره د مبارزې لپاره د چمتوالي ملي ادارې له خوا ووېشل شوې.
د دغې ادارې سرپرست نورالدین ترابي وايي، په پام کې ده چې له پلازمېنې کابل سربېره په ولایتونو کې هم د طبیعي پېښو له امله زیانمنو شویو کورنیو سره مرستې وشي.
ترابي زیاتوي: « ۵۰۰ راشنه د کابل ښار د مختلفو ناحیو هغو خلکو ته وېشل کېږي چې سېلابونو متضرر کړي وو. موږ له خپل توان سره سم یو راشن ورکوو او نن هم ۵۰۰ تنو ته یوازې اوړه او وریجې وېشو. همدارنګه هغو ولایتونو ته هم ۵۰۰ راشنه استوو چې ورته اړتیا ده. دغه خوراکي مواد له ازبېکستان، قزاقستان او نورو هېوادونو راغلي دي.»
مرسته شوې کورنۍ که څه هم د خوراکي توکو له ترلاسه کولو خوښې دي خو وايي، دا مرستې کافي نه دي او دوی تر دې ډېرو مرستو ته اړتیا لري.
دوی زیاتوي، سوړ ژمی پرې را روان دی او مرستندویه بنسټونه باید د دوی لاسنیوي ته پاملرنه وکړي.
د کابل یو تن اوسېدونکی احمد عزیزي وايي: « زه له کلا زمان خان راغلی یم. زه له هغو کسانو او هېوادونو ډېر خوښ یم چې له موږ سره یې د اوړو او وریجو مرسته وکړه. دا چې زموږ په ټولنه کې ډېر بېوزله کسان ژوند کوي، مرستې باید زیاتې شي.»
د کابل یو تن بل اوسېدونکی محمد هاشم وايي: « د حوادثو له ریاست څ مننه کوو چې دا مرستې یې موږ ته ووېشلې. تمه لرو چې له موږ او زموږ په شان نورو کسانو سره لا ډېرې او زیاتې مرستې وکړي. اوس خو یوه بوجۍ وریجې او یوه بوجۍ هم اوړه دي، خو دا بسنه نه کوي؛ ځکه چې د فامیل شمېر ډېر دی، کار او کسب هم نه لرو او د پېښو له ریاست غواړو چې له موږ او نورو کسانو سره لا ډېرې مرستې وکړي ترڅو یوه چاره او پرده وشي.»
ترابي له نړیوالو غواړي، هغه مرستې چې له ډونرانو ترلاسه کوي، باید د دغې ادارې او یاهم له اسلامي امارت سره په همغږۍ یې وویشي ترڅو مستحقو کسانو ته ورسیږي.
هغه په دې اړه وايي: « د ملګرو ملتونو ادارې د نړۍ له ډونرانو د بېوزله او غریبو د لاسنیوي او مرستې په موخه غواړي. د دوی مسوولیت دا دی، کله چې مرستې راټولې کړي، باید یا زموږ له لارې یا هم په خپله خو زموږ په همکارۍ په شفافه توګه تر مستحقینو پورې ورسوي.»
له پېښو سره د مبارزې لپاره د چمتوالي ملي اداره وايي، راتلونکو دوه ورځو کې به هم د طبیعي پېښو له امله په سلګونو نورو زیانمنو شویو کورنیو ته د خوراکي توکو مرستې ووشي.
