Skip to content
د ترکیې ولسمشر رجب طیب اردوغان وايي، اداره یې کار کوي،چې د افغانستان د شخړې حل او تاوتریخوالي درولو په موخه طالبانو سره د خبرو زمینه برابره کړي.
اردوغان زیاته کړه:« د ترکيې اړوندې ادارې کار کوي،چې له طالبانو سره خبرې وکړي، آن ممکن زه به هغه موقف کې يم، چې د هغوی له یوه مشر سره خبرې وکړم.»
اردوغان وايي، د قطر مشر سره یې هم په دې تړاو خبرې کړي، چې د طالبانو له لوري تر سره شوي اقدامات له کوم ځایه او څه ډول درولی شي او د سولې مانا داره خبرو پیل له کومه ځایه وکړي.
هغه زیاتوي:« موږ په دې خبرې وکړې،چې د طالبانو له لوري پورته شوي ګامونه چېرته بندولی شو او د سولې خبرو لپاره څه ډول او له کومه ځایه ګامونه پورته کولی شو.»
د دې ترڅنګ افغان ولسمشرمحمد اشرف غني هم د ترکیې له ولسمشر رجب طیب اردوغان سره تلفوني خبري کړي او ولسمشر غني ته یې ډاډ ورکړی،چې ترکیه په افغانستان کې د دایمي سولې غوښتونکې ده.
افغان ولسمشر دغه هېواد په سیمه کي یو ځواکمن هېواد یاد کړی او د سولې برخه کې یې د ترکیې رول اغېزمن بللی دی.
ولسمشري غني زیاته کړې:« د ترکیې د اصولي دریځ او په افغانستان کې د طالبانو ډلې له لورې د تاوتریخوالي زیاتولو په اړه د دغه هېواد د اندېښنو قدرداني کوو او په هېواد کې د عادلانه او تلپاتې سولې د راوستلو په برخه کې یې په سیمه کې د ځواکمن اسلامي هېواد په توګه د ترکیې رول ارزښتناک بولو.»
د ترکیې ولسمشر ویلي،د ترکیې حکومت او خلک د افغان ولس تر څنګ ولاړ دي او په افغانستان کې یې د تاوتریخوالي په پاېته رسولو ټينګار کړی دی.
