د کډوالو او راستنېدونکو چارو وزارت چارواکو او د لنډمهالې مېشتېدنې کمېټې غړیو د رییس الوزراء له اداري مرستیال سره په کتنه کې، د کډوالو ستونزې شریکې کړې دي.
د ياد وزارت چارواکي وایي، له ګاونډیو هېوادونو د افغان کډوالو جبري راشړل زيات شوي، خو په خبره یې د يادې کمېټې مسوولين د کمېسيون د مشرتابه په لارښوونه او د نورو کمېټو په مرسته بریالي شوي چې د راستنو شويو افغانانو د مېشتېدنې موضوع په ښه ډول مدیریت کړي.
دوی له ګاونډیو هېوادونو غواړي چې په زور د افغان کډوالو له راشړلو لاس واخلي او له دغو کډوالو سره د ښه ګاونډیتوب اصل په پام کې نیولو سره چلن وکړي.
د کډوالو او بېرته راستنېدونکو چارو وزارت مسلکي مرستیال عبدالرحمن راشد وايي: « اوسمهال د جبري شړلو موضوع مطرح نه ده، یوازې هغه مهاجرین چې قانوني اسناد نه لري او د کار لپاره تللي دي، هغوی نیول کېږي او د نورو په پرتله له ایران ډېر را اړول کېږي. له پاکستان هم راځي،خو د ایران په پرتله کم دي. همدارنګه له ترکیې هم را اړول کېږي.»
راشد دغه راز وايي، تېر کال سلګونه زره افغان کډوال له ایران، پاکستان او ترکیې په جبري ډول را شړل شوي دي.
د راشد په خبره، راشړل شویو افغانانو ته په کور دننه اړینې اسانتیاوې برابرې شوې او اوسمهال شاوخوا ۸ میلیون تنه افغانان په ایران، پاکستان، ترکیې او اروپایي هېوادونو کې مېشت دي.
راشد زیاتوي: « ګاونډي هېوادونو، اروپايي او نورو هېوادونو کې شاوخوا ۸ میلیون تنه مهاجران لرو چې له ډلې یې ۳ میلیونه په پاکستان کې دي، تقریبا ً۳ میلیونه هم ایران کې دي او شاوخوا نیم میلیون په ترکیه کې دي او پاتې نور په اروپايي او نورو هېوادو کې دي. ټولټال له ۷ تر ۸ میلیونو رسېږي.»
د ریاست الوزراء اداري مرستیال مولوي عبدالسلام حنفي د کډوالو لنډمهالې مېشتېدنې کمېټې ته لارښوونه کړې چې د ژمي موسم ته په پام د راستنېدونکو افغان کډوالو ستونزو ته په ښه توګه رسېدنه وکړي.
له دې سره سم، افغان کډوال له سرپرست حکومت غواړي چې د افغان کډوالو ستونزو د هواري لپاره د ګاونډیو هېوادونو له چارواکو سره مخامخ خبرې وکړي، ترڅو ګاونډي هېوادونه د افغان کډوالو له شړلو، او ځورولو لاس واخلي.
کډوال حاجي نظرمحمد وايي: « دلته ډېر زیاتې ستونزې دي، نه ېو.اېن.اېچ.سي.آر راځي، نه اتشې راځي. په آخر کې بیا هم د افغانستان له موجوده حکومت داغوښتنه لرو چې په پاکستان او ایران کې موږ ته ډېرې زیاتې ستونزې دي او باید د دې مخنیوی وشي.»
چارواکي وايي، له ګاونډیو هېوادونو د افغان کډوالو جبري شړلو لپاره په تورخم، کندهار، نېمروز او هرات کې پنډغالي جوړ شوي او په کې هر ډول امکانات برابر شوي دي.
په ورته مهال، د سیاسي چارو کارپوهان ایران، پاکستان او ترکیې کې د افغان کډوالو پر وضعیت اندېښنه څرګندوي او له چارواکو غواړي چې په کوربه هېوادونو کې یې ستونزو ته رسېدنه وکړي.
د سیاسي چارو کارپوه محمد سلیم پیګیر وايي:« په هغو کې د ملګرو ملتونو استازی، د افغانستان، ایران او پاکستان استازي حضور ولري، ترڅو افغان مهاجرین په تدریج سره د ملګرو ملتونو په مرسته خپل هېواد ته ستانه شي.»
د يکشنبې په ورځ د هه نګاو په نوم د ایران بشري حقونو سازمان په یوه راپور کې وويل، پر جبري اخراج سربېره تېره میاشت ۹ تنه افغانان په ایران کې اعدام شوي هم دي.
د راپور له مخې، په دغه هېواد کې د بندي افغانانو د اعدامېدو کچه مخ په لوړېدو ده، داسې چې په تېرو درېیو کلونو کې د اعدام شویو افغانانو شمېر ۹۰ تنو ته رسېدلی.
