ولسمشر غني له خپل ترکي سیال سره ټیلیفوني خبرې وکړې

افغان ولسمشر محمد اشرف غني پرون چهارشنبه د «۱۴۰۰ کال د زمري پر ۲۰مه» له خپل ترکي سیال رجب طیب اردوغان سره ټیلیفوني خبرې کړي دي.

ولسمشر د خبرو پر مهال افغانستان کې د عادلانه او تلپاتې سولې د راوستلو په برخه کې په سیمه کې د ځواکمن اسلامي هېواد په توګه د ترکیې رول ارزښتناک بللی.

د ترکیې ولسمشر رجب طیب اردوغان بیا په افغانستان کې د طالبانو  له لورې د تاوتریخوالي پر لوړې کچې اندېښنه ښودلې او ویلي یې دي، چې د ترکیې حکومت او خلک د افغان ولس تر څنګ ولاړ دي او باید په افغانستان کې تاوتریخوالی پای ته ورسېږي.

د دغې ټلیفوني مکالمې په پای کې د افغانستان او ترکیې ولسمشرانو د دواړو هېوادونو ترمنځ په بېلابېلو برخو کې د اړیکو او همکاریو پر پراختیا هم خبرې کړي دي.