عبدالله عبدالله: پر ښارو د طالبانو بریدونه دې سمدستي ودرول شي

د ملي روغې جوړې عالي شورا مشرعبدالله عبدالله دوحه کې د افغان سولې په تړاو جوړه شوې غونډه کې ویلي، چې پر ښارونو دې د طالبانو بریدونه سمدستي ودرول شي او سولې ته د رسېدو لپاره دې جدي او مانا لرونکي خبرې پیل شي.

عبدالله عبدالله ویلي، طالبانو په وروستیو میاشتو کې د سولې په خبرو کې جدیت نه دی ښکاره کړی او له همدې امله په خبرو کې پرمختګ نه دی شوی.

د نوموړي په وینا، افغانستان دا مهال له جدي امنیتي ګواښونو سره مخ دی او له اوسني بحرانه د وتلو لپاره افغان حکومت خپله طرحه د قطر هېواد ته سپارلې ده.

دوحه کې د افغان سولې په تړاو د غونډې نن وروستۍ ورځ ده، چې د افغان حکومت او طالبانو ترڅنګ د امریکا، چین، روسیې او پاکستان استازي هم ګډون پکې لري.