بایډن: له افغانستانه د خپلو ځواکونو پر اېستلو پښیمانه نه یم

د امریکا متحده ایالتو ولسمشر جو بایډن  سه شنبه د «۱۴۰۰ کال د زمري پر ۱۹مه» سپینه ماڼۍ خبریالانو سره د خبرو پر مهال وویل، له افغانستان د خپلو ځواکونو د اېستلو پر پرېکړه پښیمانه نه یم. 

بایډن وايي،زرګونه افغان ځواکونه مو روزلي او وخت یې دی،چې افغان مشران سره متحد او له خپل هېواد او خلکو نه دفاع وکړي.

امريکايي ولسمشر وايي، په تېرو شلو کلنو کې يې ميلياردونه ډالر مصرف کړي، افغان ځواکونه يې روزلي او تجهيز کړي او کولی شي جګړه وګټي.

بایډنه زیاته کړه:« نه، وګورئ، موږ د شلو کلونو په اوږدو کې  میلیاردونه ډالر ولګول، له ۳۰۰ زرو څخه زيات افغان ځواکونه مو وروزل او په نويو وسلو مو سمبال کړل. افغان مشران بايد سره راټول شي، زموږ زرګونه کسانو ژوند له لاسه ورکړ او تپیان شول.دوی بايد  د خپل ځان او خپل ملت لپاره جګړه وکړي.»

امريکايي ولسمشر ډاډ وښود،چې د افغان ځواکونو ملاتړ ته ژمن دي او په وینا یې له شته امکاناتو دې د طالبانو پر وړاندې ګټه پورته کړي. 

بایډن وايي:« د امريکا متحده ايالات ټينګار کوي،چې موږ د هوايي ځواک لاسنیوي برخه کې خپل ملاتړ ته دوام ورکوو، ځان باوري کوو،چې د افغانستان هوايي ځواک فعاليت کوي،ځواکونو ته خواړه او تجهيزات رسېږي او ټول معاشونه يې ورکول کېږي او دوی بايد جګړه وکړي.»

بايډن ويلي، افغانستان اوس مهال جدي جنګي دفاع وزير لري او بايد په سياسي لحاظ دوی سره راټول شي او خپلې ستونزې حل کړي او د ځواکونو په اړه له کړې پرېکړې پښېمانه نه دی.

بايډن دا څرګندونې داسې مهال کوي،چې د هېواد پر کچه  د نهه ولایتونو مرکزونه د طالبانو لاسته لوېدلي، مارشال عبدالرشيد دوستم له ولسمشر سره تر مشورو وروسته د شمال جګړې رهبري لپاره بلخ ته تللی او دا مهال له شمال سربېره د هېواد یو شمېر ولایتونو کې د طالبانو او افغان حکومت سختې نښتې روانې دي.