له هېواده بهر د اوسني سرپرست حکومت په مخالفت کې د سیاسي خوځښتونو او فعالانو د غونډو په دوام وړمه ورځ د ترکيې په استانبول ښار کې ځينو سیاسي فعالانو، د جمهوري نظام يوشمېر چارواکو د بندو دروازو ترشا غونډه ترسره کړې چې د دې غونډې کوربتوب حکمت خليل کرزي او ادریس زمان کاوه.
د ملي خبرو اترو بهیر لومړۍ ناسته کې ګډونوالو د افغانستان پر اوسني وضعیت او سیاسي ټیکاو ته د رسېدو پر وړاندې د موجوده ننګونو په لیرې کېدو او حل لارو باندې خبرې کړې دي.
د سیاسي چارو کارپوهان وایي، ټولې شته ننګونې د سیاسي خبرو له لارې حل کېدای شي، خو ټينګار کوي چې دغه خبرې دننه هېواد کې اغېزمنې تمامېدای شي.
د سیاسي چارو شنونکی محمد سلیم پيګیر وايي:« د افغانانو ټولې ستونزې هېواد کې دننه د سیاسي خبرو اترو له لارې حل کېدای شي. له هېواده بهر چې تر هر نوم لاندې غونډې جوړیږي هغه د افغانستان د خلکو لپاره د منلو وړ نه دي.»
یوه سرچینه شمشاد ته تاییدوي، چې پدې غونډه کې له کابل څخه جعفر مهدوي او عبدالقیوم سجادي په ګډون ځينو سیاسي فعالانو هم برخه اخیستې ده.
د نړیوالو اړیکو کارپوهان وایي، افغانستان د ټولو افغانانو ګډ کور دی او اسلامي امارت دې د یوه منظم پلان له مخې بین الافغاني جرګه داېره کړي.
د نړیوالو اړیکو کارپوه سمیر انګار وايي:« کومو کسانو او بنسټونو چې له افغانستان سره خیانت نه دی کړی، چور او چپاول یې نه دی ترسره کړی او په صادقانه ډول افغانستان ته خدمت کولو ته لېواله دي، باید دا زمینه برابره کړي. هغه کې د هر قشر خلک وي، مذهبي مشران، سیاسي ګوندونه او د خلکو استازي باید لاس سره ورکړي او دغو اندېښنو ته د پای ټکی کېږدي، ځکه تاوتریخوالی او نفاق د افغانستان د ستونزې حل نه دی او افغانستان د انزوا خوا ته وړي.»
خو ځېنې نور بیا له هېواده بهر دا ډول غونډې د افغانستان لپاره اغېزمنې نه ګڼي او ټینګار کوي چې د حل لاره د افغانانو ترمنځ ډیالوګ دی او د افغانستان دننه دې د ستونزو او ننګونو حل لپاره د سرپرست حکومت له چارواکو سره بحثونه وشي.
د سیاسي چارو شنونکی حکمت الله حکمت وايي:« همدا ښاغلي چې په استانبول، واشنګټن او لندن کې سره جرګې کوي، پټې خبرې او معاملې کوي، بیا هېواد ته د پردیو جګړو راوړل غواړي. موږ افغانان په کلکه باندې د هر نوع جګړې، د هر چا له لوري چې وي، مخالفت کوو. د حل لاره د افغانانو ترمنځ ډیالوګ د افغانستان په جغرافیه کې یو د بل په منلو باندې، یو د بل په اورېدلو باندې او له خپل هېواد سره مسوولانه چلن په پایله کې کېدی شي او بس. »
که څه هم اسلامي امارت د استانبول غونډې په تړاو څه نه وايي، خو له دې مخکې د بهرنیو چارو وزارت سیاسي معین شېرمحمد عباس ستانکزي ويلي، افغانان د نورو هېوادونو په نسخه جوړ شوی حکومت نه مني.
نوموړي همداراز د هېواد له سیاسي څېرو غوښتي چې بېرته خپل هېواد ته راستانه شي او په خبره یې په هېواد کې سوله او ټيکاو د افغانانو په یووالي کې نغښتی او اوس د ټولو مسوولیت دی چې د هېواد د ابادۍ او پرمختګ لپاره پر ګډه کار وکړي.
