د امریکا متحده ایالتو دفاع وزیر لیویډ اسټن سه شبنه د « ۱۴۰۰ کال د زمري پر ۱۹ مه» د پاکستان لوی درستیز جاوید قمر باجوه سره ټیلیفوني خبرې کړي دي.
د دفاع وزارت ویاند جان کربي وايي، اسټن په ټیلیفوني خبرو کې له هغه غوښتي،چې د طالبانو خوندي ځایونه هدف وګرځوي.
کربي وايي، په افغانستان کې د روانې جګړې اصلي لامل د پاکستان تر حاکمیت لاندې سېمو کې د طالبانو پټنځایونه دي،چې باید پر نښه او لمنځه ولاړ شي.
کربي زیاته کړه:«موږ باور لرو،چې په افغانستان کې روانه جګړه د پاکستان ترحاکمیت لاندې خاوره کې د طالبانو د خوندي ځایونو شتون له امله ده. موږ په دې کې هېڅ متردد نه یو،چې د یادې موضوع په تړاو د پاکستان له مشرتابه سره هم خبرې وکړو.»
کربي وايي یاد خوندي ځایونه نه یوازې د افغانستان لپاره ګواښ دی،بلکې له پاکستان او د پاکستان له خلکو هم قرباني اخېستلی شي.
د هغه په خبره،موږ ټول دا ګډ مسوولیت لرو، تر څو د یادو خوندي ځایونو د له منځه وړلو په برخه کې یې ادا کړو.
کربي زیاته کړه:« موږ دې ته متوجه یو،چې له یادې سیمې راپیدا کیدونکې ترهګرې ډلې له پاکستان او د پاکستان له خلک هم قرباني اخېستی شي. دا زموږ ګډ مسوولیت دی، تر څو اجازه ورنه کړو،چې یاد پټنځایونه د نورو طالبانو او ترهګرو له خوا وکارول شي او بې اتفاقي رامنځته کړي.»
له دې وړاندې افغان ولسمشر هم پر پاکستان تور پوری کړی و،چې له ډیورنډ فرضي کرښې تر لس زره جنګیالي افغانستان ته را اوښتي او له طالبانو سره یو ځای د افغان امنیتي ځواکونو پر وړاندې جنګېږي خو پاکستان تل دا تورونه رد کړي دي.
که څه هم له کلونو راپدېخوا د افغانستان پر ګاونډي پاکستان باندې تورونه دي، چې په خپله خاوره کې یې طالبانو او وسلهوالو ډلو ته پټنځایونه ورکړي او مالي ملاتړ یې کوي،خو دا ظاهرا لومړی ځل دی،چې امریکا په مستقیم ډول پاکستان ته ګوتڅنډنه کوي،چې پر ډیورنډ فرضي کرښه د طالبانو پټنځایونه له منځه یوسي.