Skip to content
د افغانستان کرېکټ ملي لوبډلې وتلي لوبغاړي راشد خان ویلي، افغانستان په کړکېچ کې راګیر دی او نړیوال یې باید یوازې پرېنږدي.
راشد خان سه شبنه د «۱۴۰۰ کال د زمري پر ۱۹ مه» پر خپله ټویټر پاڼه لیکلي، نړیوال دې له روان بحراني حالته د افغانستان په اېستلو کې مرسته وکړي.
هغه زیاته کړې:« د نړۍ مشرانو! زما ګران هېواد افغانستان له یو لوی ناورین سره مخامخ دی. هره ورځ سلګونه بې ګناه افغانان چې ښځې او ماشومان هم په کې دي شهیدان کېږي. کورونه، ښوونځي، دفترونه او نور ملي او عامه تاسیسات ویجاړېږي او زرګونه کورنۍ بې کوره او در په دره شوي دي. لطفآ له موږ سره مرسته وکړئ،چې له دغه ناورین څخه ووځو، موږ په ناورین کې مه پرېږدئ. د افغانانو وژل او د افغانستان ورانول بند کړئ. موږ سوله غواړو، جګړه باید بنده شي.»
خان له نړیوالو غوښتي،چې د خپلې انساني عاطفې له مخې دې د افغانانو وژل او د افغانستان ورانول بند کړي.
هغه داسې مهال په افغانستان کې د جګړې پای غوښتنه کوي،چې په یو شمېر ولایتونو کې سختې جګړې روانې دي او لسګونه زره کورنۍ بې ځایه شوي دي.
