اتریش، ډنمارک، بلجیم، هالنډ، یونان او جرمني هغه هېوادونه دي، چې غواړي یو شمېر پناه غوښتونکي افغانان بېرته افغانستان ته را ولېږي.
که څه هم د اروپایي ټولنې اجرائیه هیئت په اوسني وضعیت کې د پناه غوښتونکو افغانانو بېرته لېږلو د مخنیوي غوښتنه کړې، خو اتریش، ډنمارک، بلجیم، هالنډ، یونان او جرمني خپل اجرائیه هیئت ته یو لیک لېږلی، چې په کې لیکل شوي، د بېرته لېږولو بهیر ځنډول غلط پیغام لېږدوي او په باور یې کیدای شي، چې دا کار نور افغانان هم دې ته وهڅوي، چې اروپایي ټولنې ته د تللو هوډ وکړي او خپل هېواد پرېږدي.
یادو هېوادونو خپل کمېسیون ته لیکلي، په همدې موخه ترې غواړي، چې د افغانستان له حکومت سره په دې هکله جدي خبرې وکړي، چې څنګه کېدای شي افغانستان ته بېرته استول پیل او په راتلونکو میاشتو کې دا کار دوام وکړي.
خو تر اوسه د دغې ټولنې کمېسیون بېرته جواب نه دی ورکړی.