Skip to content
د پکتیا ولایتي شورا غړی محمد رحمان قادري وایي، د ګردیز کمربند ډېری پوستې سقوط شوي او که بېرته ونه نیول شي، وسله وال به وکړای شي چې د لویدیځ له لوري ښار ته دننه شي.
قادري زیاته کړه: «د ګردیز ښار امنیتي کمربند کومې پوستې چې وروستیو جګړو کې سقوط شوي، له ولایتي ادارې مو غوښتنه ده، چې دغه پوستې بېرته ونیسي او د ښار امنیت خوندي کړي.»
خو د ۲۰۳ تندر قول اردو وایي، افغان ځواکونه پر ګردیز ښار د وسله والو د ډله ییز برید د مخنیوي توان لري او په خبره یې پرون شپه هم هوایي ځواکونو وسله والو ته درنه مرګ ژوبله اړولې ده.
د ۲۰۳ تندر قول اردو ویاند ایمل مومند وايي: «زموږ امنیتي او دفاعي ځواکونه په پرلپسې ډول پر وسله والو بریدونه کوي. همدا تېره شپه هم مرکز ګردیز، سیدکرم او احمد ابا ولسوالیو کې پر وسله والو هوایي بریدونه وشول او درنه مرګ ژوبله ورته اوښتې ده.»
تازه ګردیز ښار کې سلګونه کورنۍ د جګړې له وېرې بې ځایه شوي او د خراب امنیتي وضعیت له کبله ۱۴ سیمو ته د مرستو رسولو بهیر له ځنډ سره مخ شوی دی.
د پکتیا کډوالو او بېرته راستندیدونکو چارو مشر عبید مرحوني وايي: «ډېری بې ځایه شوي هغو سیمو ته کډه شوي چې امنیتي وضعیت یې د ډاډ وړ نه دی. د سروې لپاره تهدید دی او ۱۴ داسې سیمې شته، چې د سروې ټیمونه او مرستې رسول ورته ستونزمن دي.»
د ګردیز بېلابېلو سیمو کې په پرلپسې ډول د پوستو له سقوط وروسته پر ښار د وسله والو د ډله ییز برید په اړه اندیښنې ډېرې شوي،خو تندر قول اردو وایي، وضعیت د امنیتي ځواکونو په کنټرول کې دې.
