امریکا له هر بل وخته اوس کار کوي چې په شپږو میاشتو کې طالبانو سره سولې ته ورسیږي.
په عربي اماراتو کې د امریکا ، طالبانو او افغانستان استازو ترمنځ غونډې سولې ته لېوالتیا ډېره کړې.
په روانه اونۍ کې متحده عربي امارات د امریکا ،افغانستان او طالبانو استازو د یوې غونډې کوربه و.
د افغان سولې لپاره د امریکا ځانګړي استازي زلمي خلیلزاد په ابو ذبۍ کې د امارتو، سعودي عربستان او افغانستان له استازو سره په لیدنه کې ښکېلو خواوو افغانستان کې د سولې او ثبات ټینګښت او د نړیوالو په هڅو خبرې کړي چې پایلو ته یې د ملي امنیت شورا تمه لري.
د ملي امنیت شورا وایي، غونډه کې ژمنه شوې چې د افغان حکومت په مشرۍ به د سولې پروسه کې صادقانه همکاري وکړي.
له دې سره تحلیل کوونکي وایي، عربي امارات په وسلوالو طالبانو نفوذ لري او د عربي هېوادونو همکاري به د سولې پیل شوی بهیر لاپیاوړی کړي.
له دې سره تحلیل کوونکي باور لري چې امریکا سیاستونو بدلون کړی او اوس د جګړې پرځای سولې ته هڅې زیاتې روانې دي.
په مسکو کې له ناستې وروسته په عربي اماراتو کې دا دوهمه ناسته ده چې پایلو ته یې تمه شته.
که څه هم متحده عربي اماراتو د غونډې په تړاو جزیات نه دي خپاره شوي چې ګډون وال یې څوک و خو په افغان سوله کې د عربي هېوادونو همکاري له دې امله مهمه بلل کېږي چې ګڼي طالبانو ته له دې ځایه مرستې برابریږي او نفوذ پرې لري.
سولې شورا هم له سیمه ییزو هېوادونو او نړیوالو متحدینو غواړي چې د سولې په برخه کې له افغان حکومت سره مرسته وکړي.
د سولې شورا د سیمې او نړۍ له هېوادونو غوښتنه کړې چې د خپلو ګټو لپاره دې افغانستان رقابتي جګړو ته لمن نه وهي.
د سولې روانو خبرو داسې پایله په لاس راځي چې افغانستان کې نور د جګړې بڼه د بدلون لورته روانه ده او زیات تمرکز په سوله کیږي.
امریکا او روسیه غواړي د یو ګډ تفاهم پر بنسټ د افغانستان په قضیه کې واحد نظر پیداکړي.
