په پاکستان کې د افغانستان سفارست سرپرست د اسلام آباد د سیمه ییزو مطالعاتو په انسټېټیوټ کې د افغانستان، پاکستان او منځنۍ آسیا هېوادونو ترمنځ پر اقتصادي اړیکو، فرصتونو او ستونزو خبرې کړې.
سردار محمد شکيب وایي، د افغان صادراتو پر مخ وخت ناوخت د لارو بندول، د تعرفو ناڅاپي لوړول، د باروړونکو موټرو غیر ضروري ارزونې او د وېزو په برخه کې شته ستونزې د دواوړ هېوادونو پر اړيکو ناسم اغېز کړی.
شکیب زیاته کړې:« ما د افغانستان او پاکستان پر اقتصادي اړیکو خبرې وکړې او ومې ویل چې د لارو وخت ناوخت بندېدل، تعرفو کې ناڅاپي لوړوالی، د باروړونکو موټرو غیر ضروري ارزونې، د پاکستان د وېزو صدور په برخه کې شته ستونزې او د پاکستاني لوري اړوند اقدامات پر دې اړیکو منفي اغیزې کوي چې زیان یې نه یوازې دواړو حکومتونو بلکې د کرښې په دواړو غاړو کې مېشتو خلکو ته هم رسېږي.»
شکیب وايي، افغانستان له خپل ځانګړي جغرافیایي موقعیت سره د سیمه يیزو پروژو د پلي کولو له لارې کولی شي سيمه ييز پيوستون رامنځته کړي.
د شکیب په خبره، د پاکستان تر کنټرول لاندې سيمو کې نا امني پر افغانستان او ټوله سیمه منفي اغېز لري او د دواړو هېوادونو ترمنځ اقتصادي او سوداګریزې اړیکې باید له امنیتي موضوعاتو سره ونه تړل شي.
هغه په دې اړه وايي:« زه ویلی شم چې پاکستان کې نا امني پر افغانستان او ټوله سیمه منفي اثر لري او افغانستان هېڅکله هم په خپل ګاونډ کې جګړه نه غواړي؛ بلکې اسلامي امارت اقتصاد محوره پالیسي تعقیبوي او هڅه کوي چې ټوله سیمه سره رانږدې کړي. دغه راز د پاکستان او افغانستان اقتصادي او سوداګریزې اړیکې باید له امنیتي موضوعاتو سره ونه تړل شي، دا کار به د ټولو پر ګټه وي.»
د سیاسي چارو کارپوهان وایي، سرپرست حکومت له ټولو ګاونډیانو او د سیمې له هېوادونو سره د ښو اړیکو غوښتونکی دی او زیاتوي چې اسلام آباد او کابل دې خپلې ستونزې د ډېپلوماسۍ له لارې حل او فصل کړي.
د سیاسي چارو کارپوه محمد زلمی افغانیار وايي: « په حکومتدارۍ کې د خپل ستراتيژيک عمق د پلي کولو لپاره یې پر کډوالو د فشار راوړلو او په افغانستان کې د کرنیزو محصولاتو رسېدلو پرمهال د پولو تړلو امر کړی. زه هیله لرم هر ډول تقابل چې لري، د خبرو اترو له لارې ورته حل لاره پيدا کړي نه پر افغانستان د بحران تپلو له لارې.»
د سیاسي چارو کارپوه محمد سلیم پیګیر وايي: « تر هغو چې پاکستان د افغانستان په نوم جغرافیې پر وړاندې خپله ستراتیژي بدله نه کړي، موږ دایمي ستونزې لرلې او لرو به یې.»
پاکستان په سيمه کې د افغانستان يوازینی ګاونډی هېواد دی چې تل د افغانستان پر وړاندې له دوه مخې پالېسۍ پر ګټنې تورن شوی او ان د ورته تورونو په اساس پر پاکستان نيوکې دي چې په سيمه کې د خپلو اهدافو د تعقيب لپار ترهګري روزي او تمويل یې کوي.
