پر پاکستان بندیز ولګوئ، هشټګ ته په خواله رسنیو کې پراخ کمپاین پيل شوی

په افغانستان او د نړۍ په یو شمېر هغو هېوادونو کې،چې افغانان په کې ژوند کوي، پر خواله رسنیو یې پر”پاکستان بندیز ولګوئ ” د هشټګ په کاروولو سره پراخ کمپاین پیل  کړی دی. 

لسګونه زره کسانو پر ټویټر، فېسبوک، او انسټاګرام غږ پورته کړی دی،چې پاکستان د افغانستان په چارو کې لاسوهنه کوي او نړیوال دې پاکستان منزوي کړي. 

هشټګ کې له نړيوالو غوښتنه ده،چې پر پاکستان دې بنديزونه ولګول شي.

د  هشټګ یو تن  کاروونکی امید حیران وايي: «  ډېری افغانانو دغه بهیر ته انعکاس ورکړی دی. دا یو مدني اعتراض دی. پر ملګرو ملتونو غږ کوو،چې پر پاکستان بندیز ولګوي.» 

دا هشټګ يو خودجوشه پاڅون دی،چې  د حکومت يو شمېر لوړپوړو دولتي چارواکو سربېره  د پښتون ژغورنې غورځنګ  مشر په ګډون نورو غړو هم کارولی دی.

دغه راز یو شمېر کسانو بیا  د امريکا ولسمشر جو بايډن او نورو چارواکو ته کمنټونو کې دا هشټګ کارولی دی.

د هشټګ یو تن کاروونکی اجمل غروال  وايي:«   د ټکنالوژۍ  وخت دی.په اوس وخت کې هشټګ کارونه ډېره اړینه بولم. یوازنۍ لاره،چې موږ او تاسو کولای شو، خپل غږ تر نړیوالو ورسوو، همدا هشټګ کارونه ده.» 

په چټکۍ سره دغه هشټګ عام او د ټولنيزو رسنيو يې پاڼې يې ډکې کړې، په لومړيو څو ساعتونو کې تر يو ميليون زياتو کسانو دا هشټګ کمنټ کړی او سلګونو زرو نورو پوسټ او يا ټويټ کړی وو. 

پر خواله رسنیو پر پاکستان بندیز ولګوئ، له کمپاین وړاندې، په افغان خواله رسنیو کې د افغان  امنیتي او دفاعي ځواکونو پر ملاتړ د ‘الله اکبر ‘ نارې کپماین هم شوی وو. 

څو ورځې پرله پسې د افغانستان په بېلا بېلو ولایتونو کې خلک لارو او کوڅو ته ووتل او ځینې د خپلو کورونو بامونو ته وختل او د الله اکبر نارې په ویلو سره یې د افغان امنیتي او دفاعي  ځواکونو ملاتړ وکړ.