Skip to content
کندهار ښار او ولسوالیو کې له پرون ورځې راهیسې ۲۰ ملکي وګړي ټپیان شوي او درې نور وژل شوي دي.
کندهار کې د میرویس حوزوي روغتون مسوولین وايي، له پرون ورځې او شپې راهیسې دغه روغتون ته د کندهار ښار د پنځمې، اوومې او اتمې حوزې تر څنګ له ارغنداب او ډنډ ولسوالیو څخه د شلو تنو ملکي وګړو ټپیان او د درې نورو مړي ور وړل شوي دي.
مسوولین وايي، ټپیانو کې یوه ښځه، ۵ ماشومان او ۱۴ نور لویان نارینه شامل دي.
د مسوولینو په خبره، دغه مرګ ژوبله د جګړې، چاودنو، بمبار او هاوان ګولیو له امله اوښتې ده.
جګړه، دا مهال د کندهار ښار د اوومې حوزې په میرویس مېنه، د دیارلسمې حوزې په سره غونډۍ او د پنځلسمې حوزې په حاجي عرب او قاسم پله سیمو کې روانه ده.
په ورته وخت کې داسې راپورونه هم شته، چې ارغنداب، ژېړۍ، ډنډ او دامان ولسوالیو کې بیا د افغان او بهرنیو ځواکونو له لوري هوايي بریدونه شوي دي.
