د امریکا سفارت: طالبان د برېدونو پر دوام نړیوال مشروعیت نه شي ترلاسه کولای

په کابل کې د امریکا سفارت له لوري په خپره شوې خبرپاڼه کې راغلي، افغانستان کې روان تاوتریخوالی او پر لویو ښارونو د طالبانو ډله ییز برېدونه غندي او وايي، طالبان نه شي کولای د برېدونو پر دوام نړیوال مشروعيت تر لاسه کړي او نه يې دا چاره مشروعیت ته نږدې کولائ شي.

د خبرپاڼې یوه برخه: «که طالبان غواړي چې نړيوال مشروعیت تر لاسه کړي، دوامداره بريدونه نه شي کولائ، چې دوی دې هيلې ته نږدې کړي. دوی بايد خپله انرژي سولې پروسې ته ځانګړې کړي، نه نظامي کمپاین او د جنګ دوام ته.» 

سفارت ويلي، ولسمشر بايډن د افغان ځواکونو پرر وړتیاوو ډاډه دی او کولی شي چې له خپل هېواد ساتنه او دفاع وکړي.

 د  خبرپاڼې یوه برخه: «ولسمشر جوبايډن احساس کوي او ويلي یې دي چې افغان حکومت او افغان امنيتي ځواکونو ښه روزنه ليدلې، ښه سمبال دي او شمېر یې هم زيات دی، چې بريا تر لاسه کړي. اوس د مديريت او نيت وخت دی، چې د طالبانو بريدونو او د روان تاوتريخوالي پر وړاندې ترې کار واخيستل شي.»

په همدې حال کې د افغانستان لپاره د ملګرو ملتونو ځانګړی استازی او ورسره مل پلاوی ايران ته تللی او د یاد هېواد له بهرنیو چارو وزیر سره یې بحثونو کې د افغانستان په اړه هم  خبرې کړي دي.

د ایران بهرنیو چارو وزیر جواد ظريف ويلي، نړيوال بايد  د افغان سولې پروسې برخه کې قوي دريځ ولري او روان تاوتريخوالی وغندي.

ظریف زیاته کړې: «نړيواله ټولنه بايد افغانستان کې د سياسي حل ملاتړ لپاره قوي دريځ خپل کړي. په  افغانستان کې روان تاوتريخوالی او بدې پايلې يې باید وغندي.»

کابل کې د امريکا سفارت او ايراني چارواکي داسې مهال په افغانستان کې روان تاوتریخوالی غندي او د جګړې پر ځای د سولې خبرو په بیا پيل کولو ټینګار کوي، چې په تېرو درې ورځو کې د پنځه ولایتونو ښارونو سقوط کړی او په ۱۵  نورو ولایتونو کې سختې جګړې روانې دي.