د سپینې ماڼۍ ویاندې جن ساکي ويلي، ولسمشر جو بایډن په دې نظر دی، چې افغان حکومت او افغان امنیتي او دفاعي ځواکونه تجهیزات، مسلکي روزنه او زیات تعداد لري او کولی شي پر طالبانو غالب شي.
سپینۍ ماڼۍ ویلي، د طالبانو د تاوتریخوالي پر ضد د رهبرۍ او ارادې وخت رارسېدلی دی.
جن ساکي ویلي، که طالبان په زور غواړي، چې واک ته ورسېږي، دا چاره به د طالبانو د نړیوال مشروعیت ترلاسه کولو مخنیوی وکړي.
بل پلو په کابل کې د امریکا سفارت د یوې اعلامیې په خپرولو سره ویلي، د زور له لارې د طالبانو حاکمیت ورته د منلو نه دی او په وینا یې دغه چاره د دوحې هوکړې د ژمنو خلاف ده.
کابل کې د امریکا سفارت په اعلامیه کې له طالبانو غوښتي، چې تلپاتې او هر اړخیز اوربند وکړي او د سولې مذاکراتو کې ګډون وکړي.
سفارت ویلي، طالبان دې د سولې له لارې دا یقیني کړي، چې افغانستان د ترهګرو لپاره په امن ځای نه بدلېږي.
خو طالبانو بیا تل امریکا له دوحې هوکړې پر سرغړونه تورنه کړې، چې خپلو ژمنو باندې عمل نه کوي.