وسله والو غلو هرات ښار کې د کرونا ویروس مخنیوي روغتون له ډاکترانو او کارکوونکو ټیلیفونونه او پیسې اخیستې دي.
د هرات د عامې روغتیا ریس ډاکتر عبدالحکیم تمنا وایې، تېره شپه شاوخوا یوه بجه شل تنه غله، چې پنځه یې وسله وال وو، د کوویډ ١٩ روغتون ته ننوتي، لومړی یې ځانونه طالبان معرفي کړي او وروسته یې ټول ډاکټران او کارکوونکي راټول کړي او پیسې او ټیلفونونه یې ترې اخیستي دي.
ډاکتر تمنا وایې، امنیتي ځواکونه پر وخت نه دي ور رسېدلي او غله په تېښته بریالي شوي دي.
د هرات د امنیه قومندانۍ ویاند محمود شاه رسولي وایې، د پېښې په اړه د پولیسو څیړنې روانې دي.