د اسلامي امارت ویاند ذبیح الله مجاهد وايي، په غور ولایت کې د داعش ډلې هغه دوه غړي وژل شوي چې د تېرې سنبلې مياشت کې یې پر ملکي اهل تشیع وکړو بريد کړی وو.
د مجاهد په خبره، د امنیتي ځواکونو په ځانګړو عملیاتو کې د دغې ډلې دوه غړي وژل شوي او له پټنځای يې يو شمېر وسلې او مهمات هم ترلاسه کړې دي.
هغه په دې اړه وايي:« تېره ورځ د غور ولایت مرکز اړوند د فتنه ګرو (داعش) یوه ځاله چې دوی د پټنځای په توګه ترې استفاده کوله، برید پرې وشو او په بشپړه توګه له منځه ولاړه. په دې کې د فتنه ګرو یو مشر او یو بل ملګری دا ووژل شول. له دوی وسلې او مهمات هم ونیول شول. دا هغه ډله وه، چې څه موده وړاندې یې زموږ اهل تشیع هېوادوالو باندې د غور او بامیانو ولایتونو ترمنځ برید کړی وه او ګڼ کسان یې شهیدان او ټپیان کړي وو.»
مجاهد وايي، له دغه بريد سربېره دغو کسانو په کابل، بامیانو او غور ولایتونو کې په یو لړ نورو بریدونو کې هم لاس درلود.
مجاهد وژل شوي کسان داعش ډلې ته منسوب ګڼي او په وينا دغه ګروپ د بلوچستان له مرکزونو پلان او رهبري کېده.
نوموړی دغه راز زاياتوي، په تېرو درې ورځو کې د داعش ډلې اووه کسېزه ډله نیول شوې.
مجاهد څرګنده کړه:« همدا راز د دغې ډلې یو اووه کسیز ګروپ هم دوه یا درې ورځو په جریان کې نیول شوی، دوی پسې پلټنې روانې دي. انشا الله دغه جنایتکاران به د خپلو شومو عملونو په جزا رسېږي.»
د سیاسي او پوځي چارو کارپوهان وایي، له تېرو څو لسېزو راهیسې پاکستان د داعش ډلې ته په خپله خاوره کې پټنځایونه ورکړي او دغه ډله بیا د نورو هېوادونو پر ضد کاروي.
کارپوهان وړاندیز لري چې اسلامي امارت دې د ملګرو ملتونو امنیت شورا سازمان کې شکایت ثبت کړي، څو دغه هېواد د داعش ډلې له روزنې لاس پرسر شي.
د پاکستان حکومت تراوسه پورې بیا په بلوچستان کې د داعش ډلې حضور په اړه مستقیم غبرګون نه دی ښودلی.
دا په داسې حال کې ده، چې تېره میاشت د اسلامي امارت ویاند ذبیح الله مجاهد ویلي و، داعش ډله په افغانستان کې خپل بریدونه له پاکستانه تنظیموي.
هغه زیاته کړې وه، چې د داعش ډله تر ځپل کېدو وروسته اوس یې پاتې مشران او غړي د ځينو استخباراتي سازمانونو په مرسته بلوچستان او خيبرپښتونخوا ته لېږدول شوي او هلته مرکزونه او روزنيز کمپونه لري
