د سیاسي چارو شنونکی جاوید مومند وايي:« هغه درې ډلې،چې واقعا په جګړه کې بوختې دي او د جګړې قرباني دي، هغه افغان ځواکونه دي، بل لوری طالبان دي،چې هغه هم افغانان دي او جګړه کې تلفات ویني، بل لوری یا درېیم لوری،چې په دې جګړه کې تلفات وراوړي، هغه ملکي کسان دي او دا له ټولو مهم دي،بلاخره ډېره قرباني هم همدا ملکي کسان ورکوي.»
د سیاسي چارو یو شمیر نور څارونکي بیا له نړیوالو غوښتنه کوي،چې پر طالبانو فشار راوړي،ترڅود سولې مذاکراتو ته اماده شي او روانه جګړه ودریږي.
د سیاسي چارو شنونکی بهار مل بهار وايي:« پر طالبانو باندې غږ کوو،چې د خدای امر ته او سولې ته لبیک ووايي. د خبرو او سیاسي مذاکراتو له لارې دې خپلو اهدافو ته ورسېږي. د نظامي حرکتونو له لارې، د جنګ له لارې د افغان وژنې له لارې او پر کومه پرېکړه چې دوی اوس دي، پر دغې پرېکړې دوی نه شي کولائ، داسې یوې مرحلې ته ورسېږي،چې د دوی یا د بل چا پر ګټه وي.»
د هېواد پر کچه هرات،هلمند او کندهار هغه ولایتونو وو،چې په مرکزونو کې یې شدیدې جګړې وې،خو له تېرو ۲۴ ساعتونو راهیسې جګړه نسبتا کراره شوې،خو یو لوري هم د پام وړ پرمختګ نه دی کړی.
