د بادغيس اوسېدنکي له اوږدې مودې راهيسې غوښتنه کوي چې په دې ولايت کې د افغانستان حلقوي سړک پاتې برخه جوړه شي.
د دې سړک جوړولو چارې څه باندې اووه کاله وړاندې د مخکېني دولت له خوا پيل شوې، خو د نا امنیو له امله یې چارې نیمګړې پاتې دي.
د بادغيس اوسېدونکي وایي، د ژمي په را رسېدو سره پر دې لاره تګ راتګ له ستونزو ډک وي.
د بادغیس یو تن اوسېدونکی وايي: «باید د قیصار – لامان حلقوي سړک د رغولو په برخه ثابت قدم اوسي او چارې یې عملي کړي. موږ نه غواړو بیاځل اعلان وشي چې د سړک چارې پيل شوې، خو په عمل کې څه نه وي.»
د بادغیس یو بل اوسېدونکی بیا وايي: « د ژمي په راتګ سره دغه لاره له ستونزو سره مل وي. د حلقوي سړک په څنډو کې پرتو ولسوالیو خلک د تګ راتګ پرمهال ډېرې سختۍ او تکلیفونه تېروي.»
د بادغیس د خلکو په خبره، که د حلقوي سړک پاتې برخه ورغول شي، نه یوازې د خلکو تګ راتګ به اسانه شي، بلکې د کاري فرصتونو رامنځته کولو سره به د اقتصادي پیاوړتیا لامل هم شي.
د بادغیس اوسېدونکی عبدالعزیز توکلي وايي: « که چېرې د حلقوي سړک چارې بشپړې شي، په بادغیس ولایت کې شته فقر او بېوزلي به ورسره کمه شي او د خلکو اقتصاد به ورسره ښه شي.»
د ټولګټو وزارت چارواکي د کار له ژر پیل کېدو ډاډ ورکوي او وايي، د ۲۵ کیلومټرو په اوږدوالي د بادغیس او فاریاب ولایتونو ترمنځ د حلقوي سړک د پاتې پنځمې برخې د جغل اچونې لپاره بودیجه منظوره شوې او نږدې راتلونکي کې به یې عملي چارې پیل شي.
د ټولګټو چارو وزارت ویاند محمد اشرف حق شناس وايي: « د ملي تدارکاتو په وروستۍ ناسته کې د دې سړک د ۲۵ کیلومټره پنځمې برخې اساسي رغول منظور شوي دي. شمالي ولایتونو ته د امیرالمؤمنین له سفر وروسته د ټولګټو وزارت ته امر شوی چې تر بنسټیزې رغونې پورې د دغه سړک په جغلي توګه ورغوي.»
د قیصار- لامان حلقوي سړک ۲۳۳ کیلومتره اوږدوالی لري او د لوېدیځې حوزې ولایتونه له شمال سره نښلوي.
د تېرو ۲۰ کالو په اوږدو کې له زیاتو لګښتونو سره سره، د دې پروژې ډېری برخې لا هم نه دي رغول شوې.
