د افغان امنیتي او دفاعي ځواکونو پر ملاتړ د پکتیا ولایت مرکز ګردیز ښار کې هم پرون شپه سلګونه کسان واټونو ته وتلي او د تکبیر نارې یې پورته کړې.
دوی چې د پاکستان او وسله والو طالبانو پر ضد یې شعارونه ورکول، امنیتي او دفاعي ځواکونه یې د هېواد رښتیني اتلان یاد کړل، چې پر وینا یې، له خلکو او خاورې ساتنه کوي.
د پکتیا یو تن اوسېدونکی وايي: «له امنیتي ځواکونو ولې ملاتړ کوو؟ ځکه له امنیتي ځواکونو ملاتړ کوو چې هغه زموږ د سر ساتلو لپاره راغلي دي. طالبه! ته خو زما سر اخلې، ما وژنې. کله چې ما وژنې نو زه به ستا ملاتړ نه بلکې ستا مخالفت کې ودریږم.»
د پکتیا اوسېدونکی وايي: «موږ په یوه غږ د الله اکبر نارو په ویلو سره له امنیتي ځواکونو ملاتړ اعلانوو او له سرښندونو یې مننه کوو.»
د امنیتي ځواکونو پر ملاتړ راټولو شويو کسانو تور پورې کړ چې وسله وال د ګاونډیو هېوادونو په اشاره د هېواد امنیتي بنسټونه، ښوونځي او روغتونونه ورانوي او دوی کله هم د داسې کړنو اجازه ورنه کړي.
د پکتیا اوسېدونکی: «نن جنګ د طالب او حکومت تر منځ نه دی. زموږ جنګ له پاکستان سره دی. پاکستان په مستقیم ډول له موږ سره پر جګړه بوخت دی.»
د پکتیا اوسېدونکی: «د افغانستان نظام په حقه دی او جنګي ډله په ناحقه دي. هغوی زموږ له تکبیر ویلو په وېره کې دي.»
له څو ورځو راهیسې هېواد کې خلک د امنیتي ځواکونو پر ملاتړ واټونو، کلیو او کوڅو ته راوځي او د تکبیر نارې په ویلو سره له امنیتي او دفاعي ځواکونو ملاتړ څرګندوي، چې طالبانو هم ورته غبرګونه ښودلی دی.
