د ۲۰۳ تندر قول اردو مسوولین وایي ، د ګردیز ښار حالت یې تر کنټرول لاندې دی او وسله وال پرې د ډله ییز برید توان نه لري .
د یادې قول اردرو ویاند ایمل مومند ايي، ګردیز ښار کې کافی شمیر امنیتي ځواکونه میشت دی او وروستیو ورځو کې د ښار کمربند لا ټینګ شوی دی.
مومند زیاته کړه:« د پکتیا مرکز ګردیز په اړه،چې وسله وال طالبان کوم منفي تبلیغات کوي، د خلکو د ذهنونو خرابولو په موخه دي. په ټوله کې وضعیت د امنیتي ځواکونو تر کنټرول لاندې دی او داسې څه نه شته لکه څنګه یې چې خلک په اړه اندیښنه لري.»
د ملي اردو سرتېري بیا وایي، د کمربند د ټینګښت هڅې روانې دي او اجازه نه ورکوي، چې وسله وال ښار ته دننه شي .
د ملي اردو د لومړۍ لیوا لومړي کنډک قوماندان حمزه افغان وايي: « د ګردیز شااوخوا کمربند قوي دی. موږ لا قوي کړی او نور هم کار پرې روان دی. د ګردیز اوسیدونکو ته ډاډ ورکوو ،چې وسله وال پر ښار برید نه شي کولی.»
خو ولایتي شورا ګردیز کلابند بولي او له مرکزي حکومت غواړي، چې د دغه ښار د ژغورلو لپاره دې پر وخت اقدامات وکړي .
د ولایتي شورا غړی تاج محمد منګل وايي:« حکومت دې نور د ګردیز ښار، ګردیز ته څېرمه ولسوالیو کلابندي دې ماته کړي. قوي عملیات دې پیل شي او که چېرته عملیات نه کېږي، خدای مه کړه،کومه دسیسه،چې د سولې په نوم روانه وي، بیا دې د پکتیا مسوولین ولس ته ښکاره ووایي.»
د تندر قول اردو قومانداني وایي ، پکتیا کې د له لاسه وتلو ولسوالیو د بیرته نیولو پلان وروستی شوی او نږدې ورځو کې به دغه عملیات پیل شي.