Skip to content
افغانستان کې د ملګرو ملتونو مرستندویه دفتر یا یوناما په خپل تازه راپور کې ویلي، روان تاوتریخوالي، کورونا او د سولې بهیر له فساد سره د دغه هېواد مبارزه ټکنۍ کړې ده.
راپور کې په کې دې برخه کې د افغان حکومت هڅو ستاینه شوې،خو ټینګار شوی،چې د روڼتیا او حساب ورکونې برخه کې لا هم نیمګړتیاوې شته.
په دغه راپور کې د ۲۰۲۰ کال جنوري میاشتې څخه د روان کال تر مې میاشتې پورې موندنې ځای پر ځای شوي دي.
د یوناما راپور یوه برخه:« زموږ راپورموندلې ده،چې افغانستان کې د فساد ضد د حقوقي او بنسټیزو چوکاټونو د رامنځته کولو برخه کې مثبت ګامونه پورته شوي دي. خو لا هم د شفافیت، روڼتیا او حساب ورکولو برخه کې ګڼې نیمګړتیاوې شته.»
یوناما په دې راپور کې مني،چې روان امنیتي وضیعت، کورونا وبا او د سولې روانو خبرو د دغو اصلاحاتو مخه ډب کړې،خو سپارښتنه یې کړې،چې افغان حکومت یادو مبارزو ته دوام ورکړي.
په راپور کې د افغان دولت له خوا د فساد ضد کمیسیون جوړولو هرکلی شوی او زیاته کړې یې ده، که یاد کمیسیون خپلواک واوسي، د فساد پر ضد ښه مبارزه کولی شي.
یوناما د فساد له منځه وړلو برخه کې د سترې محکمې ونډه هم کلیدي یاده کړې ده.
د یوناما راپور یوه برخه:« سترې محکمې په افغانستان کې جرمونه کم کړي دي او د ځواب ورکونې برخه کې یې اصلاحات رامنځته کړي دي. موږ وړاندیز کوو،چې د قانون عملي کولو ظرفیتونه لوړ شي، تر څو د فساد برخه کې جرمونه کشف او تورن کسان د هغوی موقف ته له کتو پرته ونیول شي.»
د یوناما مشره ډیبورا لاینز وایي، له فساد سره اغیزمنه مبارزه د دولت مشروعیت زیاتولی شي او د سوکالۍ او ټیکاو لامل کېږي.
راپور کې همداراز وړاندیز شوی دی،چې افغان حکومت دې له فساد سره د مبازې برخه کې له رسنیو، مدني فعالانو او ټولو هغو بنسټونو ملاتړ وکړي،چې په دې برخه کې له حکومت سره همکار دي.
