د افغان سولې لپاره د امریکا بهرنیو چارو وزارت ځانګړی استازی زلمی خلیل زاد له روان وضعیته د وتلو لپاره د داسې یوې لارې وړاندیز کړی دی،چې د یوې سیاسي هوکړې له مخې افغانستان کې ټول منلی حکومت جوړ شي.
خلیل زاد له دې سیاسي جوړ جاړې نه راټوکیدونکی یو دایمي حکومت په انتقالي دورې پورې تړلی دی.
خلیل زاد وايي، دا دوره باید څومره وي، اساسي قانون به یې څه وي، پر لویو مسایلو لکه د اساسي قانون پر جوړونې، بې وسلې کولو، د اړخونو یوځای کولو، د امنیتي ځواکونو اصلاح او بلاخره دا چې څوک باید د انتقالي دولت مشري وکړي، باید پر دې مسایلو بحث او تفاهم وشي.
خلیل زاد زیاته کړه:« په افغانستان کې سیاسي جوړ جاړی باید یوه دایمي حکومت ته د رسیدو لپاره یوه انتقالي دوره ولري. دا دوره باید څومره وي، اساسي قانون به یې څه وي، پر لویو مسایلو لکه د اساسي قانون پر جوړونې، بې وسلې کولو، د اړخونو یو ځای کولو ، د امنیتي ځواکونو اصلاح او بلاخره دا،چې څوک باید د انتقالي دولت مشري وکړي. باید پر دې مسایلو بحث او تفاهم وشي.»
اخوا د ملي روغې جوړې عالي شورا مشر ډاکټر عبدالله عبدالله له بي بي سي سره خبرو کې ویلي، په جګړې ټینګار او درېدل تېروتنه ده او باید طالبانو سره د افغانستان قضیه له سیاسي لارې حل شي.
هغه افغانستان کې د حکومت د بدلون په تړاو وویل، اوس یې مذاکرات هغې مرحلې ته نه دي رسېدلي.
عبدالله زیاته کړه:« موږ د سیاسي حل لپاره تیار یو،پر همدې اساس مو دوحه کې هم ټینګاروکړ،چې راځئ، پر سیاسي حل خبرې وکړو. کله چې سیاسي حل ته داخل شو،پر ټولو مسایلو خبرې کولای شو.»
خو طالبانو افغانستان کې د سیاسي جوړ جاړي لپاره په نوي اسلامي نظام ټینګار کړی او په وینا یې،په دې اړه یې توافق نامه کې پوره وضاحت شته دی او اسلامي نظام به ضرور جوړیږي.
په قطر کې د طالبانو د سیاسي دفتر ویاند ډاکټر نعیم وردګ وايي:« د نوي اسلامي نظام په اړه په توافق نامه کې په صراحت سره راغلي،چې رامنځ ته کېږي، به بین الافغاني مذاکرات هم د همدې هدف لپاره شروع او روان دي.»
د افغان سولې لپاره د امریکا استازي ویلي، اوسنی وضیعت د اندیښنې وړ دی او هیله یې دا ده،چې افغان حکومت او طالبان د سیاسي جوړ جاړي لپاره هڅې وکړي.
په اوس کې د افغان حکومت تمرکز پر امنیت دی،تر څو له لاسه وتلې سیمې بېرته ونیسي او په دې تړاو یې طرحه هم بشپړه شوې ده.