د شانګهای همکاریو سازمان ناسته په داسې حال کې پلازمېنه اسلام آباد کې جوړېږي چې پاکستان دا مهال له سختې امنیتي، سیاسي او اقتصادي بې ثباتۍ سره مخ دی.
د سیاسي چارو کارپوهان وايي، د پاکستان روان ناسم وضیعت په سیمه او ګاونډ منفي اغېز کړی.
د دوی په اند، پاکستان کې د روان وضعیت اصلي لامل د دغه هېواد پوځي ادارو غلطې پالیسۍ او ناسمې تګلارې دي.
د کارپوهانو په خبره، داسې یوهېواد چې له شدیدې نا امنۍ، سیاسي بې ثباتۍ او اقتصادي کړکېچ سره مخ وي، د شانګهای په څېر سترې ناستې جوړېدل په کې د یاد سازمان دغړیو هېوادونو له لوري خطر منل دي.
دوی د شانګهای همکاریو سازمان له غړیو هېوادونوغوښتنه کوي چې له دې فرصت په ګټنې له پاکستاني چارواکو وغواړي چې له خپلو ناسمو سیاستونو لاس پر سر شي.
د پوهنتون استاد نجیب بهادر وايي: « د پاکستان په څېر نا امن هېواد کې د شانګهای ناستې ترسره کېدل یوه مخاطره او له ریسک ډګ اقدام دی. وړاندې له دې چې سازمان خپله ناسته ترسره کړي او یوې پایلې ته سره ورسېږي، باید د بحث اجنډا دا وي چې پاکستان وپوهوي له خپلو هغو ناسمو پالیسیو لاس واخلي چې د سیمي د بې ثباتۍ لامل شوې دي.»
ځېنې نور بیا په دې اند دي، د پاکستان نظامي حکومت له لسیزو راهیسې داسې سیاستونه غوره کړي چې اوس یې پایلې د اسلام آباد پر زیان دي او سیمه یې هم اغېزمنه کړې ده.
دوی زیاتوي، په داسې یوه هېواد کې د شانګهای همکاریو سازمان ناسته ګټه نه لري او اړتیا ده چې پاکستاني چارواکي یو داسې ولسواک نظام رامنځته کړي چې اقتصاد محوره سیاست ولري او ګاونډیان یې هم له زیانونو خوندي وي.
د سیاسي چارو کارپوه حکمتالله حکمت وايي: « پاکستان په خپلو غلطو سیاستونو سره نه یوازې خپله خاوره نا امنه کړې بلکې په سیمه کې هم د بې ثباتۍ لوی لامل د پاکستان حکومت دی. کېدای شي د شانګهای همکاریو سازمان ناسته په پاکستان کې وشي، خو اغېزې به یې ځکه کمې وي چې پاکستان به بیا هم په داخلې ستونزو کې بند وي او سیمه به ورسره کړېږي. د ستونزو د حل لاره دا ده چې په پاکستان کې یو ولسواک او د اقتصاد محوره پالیسۍ لرونکی حکومت رامنځته شي.»
هغه څه چې اوس پاکستانی ولس او د دغه هېواد حکومت ورسره مخ دی، د هغو سیاستونو پایله ده چې د پاکستان له رامنځته کېدو تردې مهاله د پوځ او نورو نظامي ادارو له لوري غوره شوي وو.
د سیاسي چارو کارپوه هاشم الکوزی وايي، ترهغې چې اسلام آباد د خپلو ګاونډیانو پر وړاندې سیاست بدل نه کړي او د ترهګرۍ روزنې په برخه کې پر خپلې ستراتیژۍ له سره کتنه ونه کړي، وضعیت به یې لاپسې کړکېچن شي.
الکوزی په دې اړه وايي: « دا د پاکستان د پوځ پالیسي وه چې په خپله خاوره کې د ترهګرو روزونه وکړي او خوندي ځایونه ورکړي، ترڅو د دوی په وسیله نور هېوادونه او ولسونه نا امن کړي، خو دوی اوس په خپله لومه کې بند دي او همدارنګه ولس، خلک، سیاسیون او ګوندونه یې پر وړاندې درېدلي دي.»
د پي.ټي.آی ګوند مشر او د دغه هېواد پخواني لومړي وزیرعمران خان زنداني کولو، له ډیورنډ فرضي کرښې هاخوا پښتنو سره د پوځ ناسم چلن او د هغوی سختو اعتراضونو د پاکستان سیاسي کړکېچ لاپسې ژور کړی.
له بلې خوا، د پاکستاني طالبانو تحریک (ټي.ټي.پي) بریدونو او د بلوڅ آزادي غوښتونکو وسله والې مبارزې بیا د دې هېواد امنیتي وضعیت سخت ننګولی.
