له څو میاشتیني ځنډ وروسته یو ځل بیا د پوهنتونونو دروازې د زده کړیالانو پر مخ خلاصې شوي، خو د واکسین لګول پرې جبري شوي دي.
زده کړیالان د حضوري زده کړو پيل ته خوښ دي،خو وايي، له اړوندو ادارو غواړي،چې د کورونا وبا ضد واکسین لګول باید اختیاري وي،ځکه ځینې کسان ورته زړه نه ښه کوي.
د کابل پوهنتون یو تن زدکړیال: وايي:«د واکسین اجباري کولو ته اندېښنه لرو،ځکه حکومت باید دغه پروسه اختیاري کړي.»
د کابل پوهنتون یو تن زدکړیال:« د پوهنتون پیل ته خوښ یو،ځکه انلاین زده کړو سره ستونزې زیاتې وې،خو کورونا وبا ته هم اندېښنه لري.»
پر لیکه یا انلاین زده کړو هم شکایتونه کېدل،چې پر وخت او معیاري ډول افغانستان کې نه وو او مثبت اغیز یې ونه کړ.
د حضوري زده کړو پیل سره لوړو زده کړو او عامې روغتیا وزارتونو پر زده کړیالانو واکسین اجباري کړي دي.
د لوړو زده کړو وزارت ویاند حامد عبیدي وايي:« پر ټولو زده کړیالانو د واکسین تطبیق اجباري دی او د پوهنتونونو لیلې امتیاز به ورنه واخېستل شي.»
د عامې روغتیا وزارت وايي، ۳۴ ولایتونو کې ټولو خلکو ته د واکسین پروسه دوام لري او زده کړلان کولائ شي،نږدې مرکزونو کې واکسین وکړي.
دغه وزارت وایي، ډېر ژر به په بشپړ ډول پوهنتونونو کې ټولو زده کړیالانو ته واکسین تطبیق کړي.
د یاد وزارت ویاند میرویس علیزی وايي:« موږ د واکسین ټیمونه ډېر وو او ژر تر ژره به ټولو خصوصي او دولتي پوهنتونونو او ښوونځیو کې ښوونکو او له اتلس کاله لوړو زده کوونکو باندې به په بشپړ ډول تطبیق شي.»
تېرو ۲۴ ساعتونو کې د ټول هېواد په کچه ۳۶۱ مثبتې پیښې ثبت شوې او همدې موده کې ۳۲ کسان له کورونا وبا مړه شوي.