د سیاسي چارو یو شمېر شنونکي وايي، د طالبانو پر ضد پاڅونونه ځکه ګټور دي،چې د سیمې خلک دي، ګواښونه ښه پيژني او لمنځه وړلو کې یې تجربه لري.
دوی وايي، د حکومت دغه پرېکړه ده، په اوسنیو شرایطو کې چې د سولې پروسه ناکامه شوې او جګړې زور اخیستی، دا کار کولای شي چې ګټور تمام شي.
په ناروې کې د افغانستان پخوانۍ سفیره شکریه بارکزۍ وايي: «له هغه وخته چې د سولې پروسه پیل شوې، نه یوازې دا چې سولې ټینګه نه شوه، بلکې تاوتریخوالی زیات شوی دی او افغان حکومت سیمې له لاسه وکړي. د دغه تاوتریخوالي په برخه کې د ملکي تلفاتو ترڅنګ عامه تاسیسات هم ویجاړ شوي دي، په داسې شرایطو کې د افغانستان د جګړې او سولې لپاره د ولسونو بسیج معقوله او پرځای لار ده، چې انتخاب شوې او ولسونه به له خپله هېواد دفاع وکړي.»
د دوشنبې په ورځ ولسمشر محمد اشرف غني د ملي شورا دواړو خونو ځانګړې ناسته کې د طالبانو پروړاندې د سیاسیونو پر یووالي او د لسونو پر انسجام ټینګار وکړ.
خو یو شمېر شنونکي بیا وايي، هغه ځواکونه چې حکومت یې انسجام غواړي او حساب پرې کوي، د باور وړ نه دي.
د سیاسي چارو شنونکی حکمت الله حکمت وايي: «اوس جګړه له ولسوالیو ولایتونو مرکزونو ته رسیدلې او د هرات، کندهار او هلمند د ښارونو په منځ کې د جګړې دوام هغه څه دي چې حکومت یې اړ کړ، چې پر خپل جګړیز سیاست له سره غور وکړي. زما په باور هغه ځواکونه چې اوس یې حکومت انسجام غواړي او حساب پرې کوي، د باور وړ نه دي، ځکه دا ځواکونه د خپلو ګټو لپاره جنګیدونکي دي، نه د هېواد او ګډو ارزښتونو لپاره، د ولس انسجام او د مخالیفینو پر وړاندې راپاڅول، بیل سیاست غواړي، چې اوس دحکومت ترې لرې دی.»
یو تحلیل دا هم دی چې د اوسنۍ جګړې ترسیم د حکومت د بدلېدو لپاره شوی او له صحنې د اوسنیو چارواکو حذف یې بله برخه ده او له دې کاره حکومت او سیاسیون خبر دي، اوس هڅې کوي، چې د خلکو بسیج په نوم ایتلافي حکومت لپاره کار وکړي.
د سیاسي چارو شنونکی عزیز معارج وايي: «د افغانستان جګړه داسې ترسیم شوې چې اوس د بل حکومت راتلل حتمي شوي او هغه کسان چې د خلکو بسیج خبره کوي، په راتلونکي حکومت کې به له صحنې حذف شي. نو اوس د خلکو د انسجام په نوم هڅې کوي چې مشراکتي حکومت رامنځ ته کړي، ترڅو خپله بقا یقیني کړي.»
دمګړۍ د کندهار، هلمند او هرات ولایتونو په مرکزونو کې د افغان ځواکونو او طالبانو ترمنځ شدیده جګړه روانه ده.
دواړه لوري یو بل ته د درنو تلفاتو اړولو ادعا لري، خو د جګړې اصلي قرباني عام خلک دي، چې د سر زیان ترڅنګ مالي زیان هم ورسېدلی دی.
