ځايي چاراوکي وايي، مرکز ګردیز کې شااوخوا ۵ او سیدکرم ولسوالۍ کې ۱۰ ښوونځي د جګړې له امله تړل شوي او زرګونه زده کوونکې ازموینو کې ګډون نه شي کولی.
د سید کرم ولسوالۍ اړوند د حضرت علي لیسه،چې د جګړې له سیمې لیرې پرته ده او زده کوونکي یې د ازموینو لپاره راغلي، د جګړې پر ښکیلو خواو د اوربند غږ کوي او وایي، سیدکرم کې دې جګړه ودرول شي، څو ټول زده کوونکي په ازموینو کې برخه واخلي .
د سیدکرم ولسوالۍ د حضرت علي لیسې یوه زده کوونکې وايي:« زموږ غوښتنه دا ده،چې په سیدکرم ولسوالۍ کې او هېواد په ډېری برخو کې جګړه روانه ده او باید دا جګړه ودرول شي. مرور وروڼه سره پخلا شي.»
د سیدکرم ولسوالۍ د حضرت علي لیسې زده کوونکې وايي:« جنګ دې ورک شي، نو دې ورک شي. موږ سوله غواړو. زه غواړم، ښوونځی ووایم او ډاکټره شمه.»
د پکتیا اوسېدونکي هم پر حکومت او طالبانو د سولې او اوربند غږ کوي،څو ماشومان یې وکړای شي، په ډاډه زړه ښوونځیو ته لاړ شي .
د پکتیا اوسېدونکی وايي: « له دواړو غاړو مو دا غوښتنه ده،چې د پوهنې په چوکات کې چې هرڅوک وي، له سیاست لرې خلک دي. غواړو،چې پر هغوی رحم وکړي.»
د پکتیا اوسېدونکی وايي: « موږ غواړو،کوم ښوونځي،چې تړل شوي دي، باید بېرته خلاص شي او د زده کوونکو خوارۍ باید عبث ولاړې نه شي.»
اخوا د پوهنې ریاست مشر کوچی ځاځی بیا وایي، که جګړه ونه درېږي ، د وزارت لایحې له مخې، به له دغو زده کوونکو د کال په پای کې ازموینې واخېستل شي.
ځاځي زیاته کړه:«په مرکز ګردیز کې څلور یا پنځه ښوونځي او په سیدکرم ولسوالۍ کې شااوخوا ۱۰ ښوونځي به وي،چې هلته جګړه ده او د جګړې له امله زده کوونکي نه شي کولائ،چې ازموینه ورکړي. د پوهنې وزات د لایحې له مخې، له هغو زده کوونکو موږ څلورنیمې میاشتنۍ ازموینه د کال اخر کې هم اخېستل شو.»
د جګړې له کبله یوازې د مرکز ګردیز او سیدکرم ولسوالۍ کې د ۱۵ ښوونځیو زده کوونکي ازموینو کې ګډون نه شي کولی او د دغه ولایت نورو ښوونځیو کې د ازموینو بهیر په نورمال ډول روان دی.
