د پکتیا ولایت په ډنډ پټان ولسوالۍ کې د تېز باد او توپان له امله ګڼ شمېر استوګنیز کورونه زیانمن یا هم په بشپړه توګه ویجاړ شوي دي.
ځایي اوسېدونکي وایي، د توپان له امله په دې ولسوالۍ کې خلکو ته مالي زیانونه اوښتي.
د ډنډ پټان ولسوالۍ یو تن اوسېدونکی وايي: « زموږ کورونه توپان ونړول او اوس بې کوره یو. تر اوسه چا د کورونو جوړولو لپاره مرسته نه ده کړې.»
د همدې سیمې یو شمېر نور زیانمن شوي هم د توپان له امله د پراخو مالي زیانونو خبره کوي.
د دوی په خبره، د سرپناه او خوړو په برخه کې له ګڼو ستونزو سره مخ دي او اړتیا ده چې سرپرست حکومت او مرستندویه بنسټونه ورسره پر وخت او بېړنۍ مرستې وکړي.
د ډنډ پټان ولسوالۍ یو تن اوسېدونکی په دې اړه وايي: «هر څه ته اړتیا لرو، خو تر ټولو عاجل د سرپناه او کورونو ستونزه ده.»
د سیمې یو تن بل اوسېدونکی هم ورته خبرې کوي او وايي: « توپان هرڅه له منځه وړي، زراعت او باغونه یې په بشپړه توګه ویجاړ کړي او د کورونو حالت داسې دی لکه بمبار چې پرې شوی وي.»
په ورته مهال، ځایي چارواکي وایي، د یادې طبیعي پېښې له امله یې زیانمنو شویو کورنیو سره بېړنۍ مرستې کړې خو هڅه کوي چې زیانمنو خلکو ته د بېلابېلو موسسو له لارې هم مرستې ورسوي.
د پکتیا طبیعي پېښو ته د رسېدو رییس نثار احمد نجات وايي: « موږ سیمې ته رسېدنه کړې او خلکو ته مو ځینې خوراکي او غیر خوراکي توکي وېشلي دي. د بېلابېلو موسسو له خوا ټیمونه جوړ شول او سروې ترسره شوه. په لنډ وخت کې به خلکو ته د نورو مرستو وېش هم پیل شي.»
د خلکو او چارواکو د مالوماتو له مخې، دغه توپان د خلکو او څارويو د ژوبلولو ترڅنګ یې درانه مالي زیانونه اړولي او شاوخوا ۳۰ کورونه یې ویجاړکړي دي.
