د افغانستان امنیتي او دفاعي سکتور ویاند اجمل عمر شیواري نن « یکشنبه د زمري ۱۰مه » کابل کې د یوه خبري کنفرانس پرمهال وویل، سیاسي او ځينو جهادي څېرو له ولسمشر سره لېدنه کې د افغان وسله وال پوځ څخه ملاتړ اعلان کړی او ژمنه یې ورسره کړې، چې د نظام او جمهوریت پر ننګه ورسره درېدلي دي.
شینواری زیاتوي:« سیاسي او جهادي رهبرانو له ولسمشر سره په لیدنه کې د افغانستان له وسله وال پوځ څخه د خپل ملاتړ اعلان وکړ. رهبرانو د هر یرغلګر او ترهګریزې ډلې په مقابل کې د افغان امنیتي ځواکونو قدرداني وکړه او ژمنه یې وکړه، چې هڅه کوي خلک د مصلح قواوو د ملاتړ لپاره منسجم کړي.»
د سیاسي چارو یو شمېر تحلیل کوونکي بیا وايي، ډېرکله سیاسیونو د امتیاز په بدل کې له حکومت سره د یوځای کېدو او مخالفت کې لارې بېلې کړي دي.
دوی وايي، اوس که حکومت او نظام ته زیان اوړي، نو سیاسیون هم له دې امله زیان سره مخ کېږي.
د سیاسي چارو تحلیل کوونکی سبحان الله مصباح وايي: «په افغانستان کې د امنیت د ټینګښت یو عمده مسله دا ده چې پر ملي کچه سیاسي اجماع نه لرو. دغه سیاسیون چې پرون په ارګ کې راټول شوي وو، د دوی راټولېدل مثبته خبره ده، یوه اړیتا ده. که سیاسیون حکومت سره یوځای نه شي، نو خدای مه کړه، هم به سیاسیونو ته تاوان ورسیږي او هم به نظام ته. اوس د دې وخت رارسېدلی دی، چې ټول سیاسیون پرته له کومې سیاسي سلیقې د حکومت او امنیتي ځواکونو څنګ کې ودریږي، له نظام ننګه وکړي او د دښمنانو په مقابل کې جګړه وکړي.»
خو یو شمېر نور د سیاسي چارو تحلیل کوونکي بیا وايي، سیاسیون د اعتماد وړ نه دي او همدا خلک د دې لامل شوي، چې د افغانستان خلک له بحران او کړکېچ سره مخ شي،هغه کړکېچ چې اوس په عملي توګه افغانان ورسره مخ دي.
د سیاسي چارو تحلیل کوونکی توریالی ځاځی وايي: «همدغه سیاسیون د دې هېواد د کړکېچ او بحران اصلي عاملین دي او په دوی باور کول لویه تېروتنه ده. دوی وطن وران کړی او ولس یې له بدبختۍ سره مخ کړی ده. دوی هېڅکله د ولس او وطن په ګټه نه شي تمامېدلی، نو دوی باندې باور کول نه بښوونکې تېروتنه ده.»
د جمعیت اسلامي د یوې ډلې مشر استاد عطامحمد نور له خپلو درې زامنو سره په بلخ کې جګړې ته راووته، خو د طالبانو د جګړې تاب یې رانه وړ او هغه ولسوالۍ یې ونیوله چې استاد نور په کې پوځي مانور وکړ.
له دې وړاندې طالبانو له سیاسونو غوښتي ول، چې یا له دوی سره یوځای شي او یا بې طرفه پاتې شي.