د افغانستان ملي المپیک کمېټې سکرټر جنرال یونس پوپلزی ویلي،د ځغاستې افغان لوبغاړي شاه محمود نورزي د سیالۍ په ترسره کولو سره د افغانستان ګډون د ۲۰۲۰ زېږدیز کال د توکیو په المپیکي سیالیو کې پای ته ورسید.
له افغانستانه دغه سیالیو ته ۵ لوبغاړي ورغلي ول، چې فهیم انوري د لامبو وهلو برخه کې،فرزاد منصوري په تکواندو، شاه محمود نورزي او کیمیا یوسفي د ځغاستې برخه کې او مهدي یاوري د نښې ویشتلو په برخه کې ولوبېدل.
د پوپلزي په خبره، افغانستان سږکال په دې سیالیو کې د تیر پرتله ښه وځلېد او دغو سیالیو ته غوره شوي لوبغاړي کولای شي،په راتلونکي کې افغانستان ته سترې لاسته راوړنې ولري.
ټاکل شوې وه،چې د توکیو المپیک سیالۍ په ۲۰۲۰ کال په توکیو کې ترسره شي، خو د کورونا وبا له امله دغه سیالۍ وځنډول شوې.
دا سیالۍ د جولای په ۲۳ مه پیل شوې او د روانې اګسټ میاشتې تر ۸ پورې به دوام وکړي.
په دې سیالو کې له ۲۰۷ هېوادونو شااوخوا ۱۱ زره ۳ سوه لوبغاړو په ۴۷ ډوله سیالیو کې د ګډون لپاره ونډه اخېستې ده.