یوولس کلن یاسر د قرآن شریف د حفظ لپاره له خپل ورور سره یو ځای مدرسې ته ځي، لویه هیله یې د قرآن شریف د پاڼو لیدل او نورو ماشومانو ته ور زده کول ده.
سره له دې چې ياسر نابینا دی خو د ځیرک قلم په مرسته بریالی شوی چې د قرانکریم څلور سپارې حفظ کړي.
هغه وايي: « زه مې له ورور سره راځم او خپل درسونه د قلم په مرسته وایم. وروسته بیا بېرته د مشر ورور په مرسته کور ته ځم.»
دی له سرپرست حکومته غواړي چې د ده په څېر نورو نابینا ماشومانو ته ځانګړي ښوونیز مرکزونه جوړ کړي او له نورو کورنیو هم هیله لري چې نابینا ماشومان یې د دیني او عصري علومو زده کړې لپاره ښوونځیو او مدرسو ته ولېږي.
یاسر په دې اړه وايي: « ډېر افسوس کوم چې زه نا بینا یم او نه شم کولی قرآن ووینم. زه له زده کوونکو هیله لرم چې راشي لوست وکړي او قرآن زده کړي.»
د ياسر استادان او ټولګیوال وایي، سره له دې چې یاسر څه نه شي ليدلی، خو د زده کړې ښه او بشپړه وړتيا لري.
ښوونکی محمد رفیع سروري وايي: « له دې امله چې نا بینا دی، د نورو زده کوونکو په پرتله ډېره مرسته او خواري ورسره کوو. په ډېرې سختۍ سره قرآنکریم حفظ کوي او موږ او کورنۍ یې هم ملاتړ کوو؛ تر اوسه یې څلور سپارې قرآن حفظ کړی دی.»
یو بل ښوونی احمد ضیا بیا وايي: «یاسر نابینا دی او په ډېرې سختۍ د قرآنکریم حفظ کوي. د ټولو مرستې ته اړتیا لري او د ځیرک قلم په وسیله غوږ نیسي. راځي له موږ سره قرآنکریم لولي او موږ یې غلطیانې ور اصلاح کوو.»
بله خوا، د فراه تخنیکي او مسلکي زده کړو آمریت مسوولین وایي، نابینایانو ته د زده کړو زمینې برابرولو په هڅه کې دي خو دې برخه کې د مسلکي ښوونکو نه شتون لویه ستونزه ده.
د فراهتخنیکي او مسلکي زده کړو آمر سید یوسف وايي: « وړاندې مو هم نابینایان لرل او اوس یې هم نوملیکنه ادامه لري. په دې برخه کې زموږ ستونزه دا ده چې د نابینایانو لپاره مسلکي ښوونکي نه لرو. همدارنګه د دوی لپاره د لوست مواد هم له عادي زده کوونکو سره توپير لري.»
نابینایان فراه کې ځانګړی ښوونځی نه لري او کورنۍ يې هم اولادونو ته د ځانګړو ښوونځیو او ښوونیزو مرکزونو د جوړولو غوښتنه کوي.
