د ریاست الوزراء سیاسي مرستیال مولوي عبدالکبیر پر مشرۍ د اسلامي امارت سياسي کمېسيون ناسته کړې.
په دې ناسته کې ګڼو چارواکو ګډون کړی او د افغانستان او سیمې پر سیاسي وضعیت، د سترو سیمه ییزو پروژو پرعملي کېدو، د سرحدي سیمو د امنیتي او ټولنیز وضعیت د لا ښه کېدو او له یو شمېر هېوادونو سره د اړیکو پر پیاوړتیا خبرې شوې.
ناسته کې ټینګار شوی چې افغانستان د خپلو بندرونو او سرحدونو د امنیت خوندي کولو لپاره چمتو دی او هېچا ته له افغانستانه د نورو هېوادونو ګواښلو اجازه نه ورکوي.
د اسلامي امارت مرستیال ویاند حمدالله فطرت وايي: « اسلامي امارت سیاسي کمیسیون د ریاست الوزرا د سیاسي مرستیال مولوي عبدالکبیر پر مشرۍ په سپېدار ماڼۍ کې غونډه وکړه. په دې ناسته کې د سیاسي کمېسیون غړیو، د ملي دفاع وزارت لوی درستیز او د کورنیو چارو وزارت لوی مرستیال ګډون درلود، د افغانستان او سیمې په سیاسي او امنیتي وضعیت خبرې وشوې. په دې ناسته کې د سترو اقتصادي پروژو پر عملي کولو، د سرحدي سیمو امنیتي او ټولنیز وضعیت ښه والي او له یو شمېر هېوادونو سره سیاسي اړیکو پر پياوړتیا بحث وشو. دغه راز په ناسته کې ټینګار وشو چې افغانستان د خپلو سرحدونو ساتنې ته چمتو دی او هېچاته اجازه نه ورکوي چې د افغانستان له خاورې نورو ته زیان واړوي.»
د سیاسي چارو شنونکي بیا له هېوادونو سره پر متقابل احترام ولاړو اړیکو ټینګار کوي او د هېوادونو ترمنځ تګ راتګ د کړکېچونو د حل لپاره مهم بولي.
د سیاسي چارو شنونکی ادریس محمدي ځاځی وايي: « زما په اند، دلته باور کول او باور جوړولو ته زمینه برابرول مهم دي. همدارنګه د هېوادونو ترمنځ راشه درشه او د ګاونډیانو ترمنځ پر یوبل اعتماد کول مهم دي. اسلامي امارت پر خپلو ژمنو ولاړ دی او تل دا خبره کوي چې افغانستان نه چا ته ګواښ دی او نه هم اجازه ورکوي چې له خاورې یې چاته ګواښ پېښ شي.»
که څه هم له تېرو درېیو کلونو راهیسې اسلامي امارت په پرله پسې توګه ګاونډیو او د سیمې هېوادونو ته د امنیت ډاډ ورکوي؛ خو لاهم دغه اندېښنې پر لوړه کچه دي.
دوی وایي، که ګاونډي او د سیمې هېوادونه هم افغانستان ته دا ډول ډاډ ورکړي، نیابتي او ترهګرې ډلې به په سیمه کې له منځه لاړ شي.
د سیاسي چارو شنونکی محمد زلمی افغانیار وايي: « په تېرو درېیو کالو کې سرپرست حکومت نړۍ او ګاونډیانو ته ډاډ ورکړی چې له خاورې یې پر هېچا تېری نه کېږي؛ آیا ګاونډیان هم کولی شي په دومره وضاحت سره افغانستان ته ډاډ ورکړي چې په دغو هېوادونو کې مېشتې ترهګرې او نیابتي ډلې افغانستان ته نه استول کېږي؟»
دا په داسې حال کې ده چې له دې مخکې د سیاسي کمېسیون غونډه کې د افغانستان او ګاونډیو هېوادونو ترمنځ د اړیکو پر ښه والي ټینګار شوی و او په هغه ناسته کې چارواکو ډاډ ورکړ چې اسلامي امارت له هېڅ هېواد سره ستونزه نه لري او د امريکا په ګډون د سيمې او نړۍ له ټولو هېوادونو سره د مثبتو اړیکو غوښتونکی دی.
