نږدې یوه میاشت وړاندې د افغانستان په خاوره کې د ټاپي ګازو نل لیکې عملي چارې پيل شوې، خو د چارواکو له څرګندونو ښکاري چې کارونه یې ټکني روان دي؛ له همدې امله چارواکي ټينګار کوي چې د دې پروژې عملي چارې بايد چټکې شي.
د کانونو او پټروليم وزارت سرپرست ملا هدایت الله بدري د دې پروژې له اجرائيوي ریيس سره د پروژې پرعملي چارو غږېدلی او ټينګار يې کړی چې د دې پروژې عملي چارې بايد له اوسني حالت څخه لا ډېرې چټکې شي.
بدري ډاډ ورکړی چې سرپرست حکومت د ټاپي پروژې تطبيق ته ژمن دی او په دې برخه کې به هر اړخيزو همکاريو ته دوام ورکوي.
د کانونو او پټرولیم وزارت ویاند همایون افغان وايي: « په دې لیدنه کې د ټاپي پروژې اړوند بېلابېلو برخو خبرې وشوې. همدارنګه د افغانستان په خاوره کې د دې سترې پروژې د کارونو پر چټکتیا، د پروژې په مسیر کې د نویو کمپونو پر جوړولو، د ګازو د وېش او افغانانو ته د کاري فرصتونو او تحصیلي بورسونو ورکولو په تړاو بحثونه وشول. د کانونو او پټرولیم وزارت سرپرست ډاډ ورکړ چې یاده پروژه د افغانستان او سیمې لپاره ډېره مهمه ده او دغه وزارت په دې اړه هر ډول همکاریو ته چمتو دی.»
سوداګر هم دغه پروژه په سيمه کې د افغانستان سياسي او اقتصادي اړيکو د پراختيا لپاره حياتي بولي او ډاډ ښيي چې د عملي چارو په جريان به يې زرګونه افغانانو ته په مستقيمه او غير مستقيمه توګه د کار کولو زمينه هم برابره شي.
سوداګر عبدالنصیر رشتیا په دې اړه وايي: « دا ښه ده چې دواړه لوري په دې اړه ژمن دي، چې د پروژې چارې په چټکۍ سره مخته لاړې شي. هغه څه چې د افغانستان لپاره ډېر مهم دي، په کلنۍ کچه د ۴۵۰ میلیونه امریکايي ډالرو ترانزیت ترڅنګ د برېښنا، نوري فایبر او رېل پټلۍ د درېیو نورو پروژو حرکت دی چې کولی شي لسګونه زره کسانو ته د کار زمینه برابره کړي.»
د اقتصادي چارو کارپوهان بيا له دې کبله د يادې پروژې تطبيق ته د حکومت جدي پاملرنه غواړي چې په وسيله يې افغانستان له منځنۍ آسيا سره د سوېلي آسيا د پيوستون نقطې په توګه خپل رول تثبيتوي.
د اقتصادي چارو کارپوه جنت فهیم چکري وايي: « د دې پروژې په چټکتیا کې چې څومره امکان وي، باید درېغ نه شي؛ ځکه له دې پروژې سره ځینې داسې ملاحظات شته، که ځنډ من شي، ښايي زیانونه وزیږوي.»
د اقتصادي چارو کارپوه عبدالصادق حمیدزی وايي: « دا چې د پروژې عملي چارې پیل شوې او د افغانستان له خوا د پوره همکاریو ډاډ ورکړل شو، اوس تمه دا ده چې لږترلږه د هرات تر ګذرې ولسوالۍ پورې یې چارې بشپړې شي.»
ټاپي د ګازو لېږدونې هغه نل لیکه یا پایپ لین دی چې شاوخوا ۱۸۱۴ کیلومټره اوږدوالی لري او د ترکمنستان ګاز د افغانستان له لارې پاکستان او هند ته لېږدوي.
دغه نل لیکه د افغانستان له هرات، فراه، نیمروز، هلمند او کندهار ولایتونو تېرېږي.
