که څه هم په تېرو درېیو کالو کې د هېواد په بېلابېلو برخو او سيمو کې ځينې امنيتي پېښې او پېچلي بریدونه ترسره شوي، خو د یوشمیر ګاونډیو هېوادونو په پرتله افغانستان ډېر امن دی.
د کورنېو چارو وزارت پاکستان او یو شمېر نورو هېوادونو ته په اشارې وایي، د افغانستان خاوره د هېڅ هېواد په ضد نه ده کارول شوې او نه به هم اسلامي امارت کومې ډلې ته فرصت ورکړي چې دا خاوره د بل هېواد یا ملت پر ضد وکاروي.
د کورنیو چارو وزارت ویاند مفتي عبدالمتین قانع وايي: « که څه هم د افغانستان په خاوره کې د ځینو امنیتي پېښو عوامل د دوی اتباع وو؛ خو موږ بیا هم غواړو د سیمې له هېوادونو سره ښې اړیکې ولرو. موږ له دوی تمه لرو چې د خپلو سیمو امنیت خوندي کړي او موږ به هم ډاډ ورکوو چې د افغانستان خاوره د چا پر ضد نه کارول کېږي.»
د اسلامي امارت چارواکو تل ډاډ څرګند کړی چې په افغانستان کې ترهګرې ډلې ځپل شوي، مګر دغه ډلې له افغانستانه د باندې مرکزونه لري او له هغه ځایه افغانستان ته استول کېږي.
د سیاسي چارو کارپوهان وايي، سرپرست حکومت په تېرو درېیو کلونو کې د ترهګرۍ ضد کافي مبارزه کړې خو ځينې هېوادونه چې د نیابتي ډلو روزونکي دي، د افغانستان وضعیت په ناامنه ښودلو سره، نامسولانه څرګندونې کوي.
د سیاسي چارو کارپوه حکمت الله حکمت وايي: « د سیمې هېوادونه د خپلو ناسمو پالیسیو له امله په خپلو هېوادونو کې له نا امنیو سره مخامخ شوي. په ځانګړې توګه د پاکستان په څېر هغو هېوادونو کې د امن راتګ ممکن نه دی چې د ترهګرۍ د روزلو په مرکزونو بدل شوي. افغانستان له پنځو لسیزو وروسته له جګړو وتلی او مثبت سیاست خواته روان دی؛ هغه سیاست چې په کې د ترهګرو روزل، له ګاونډیانو سره دوښمني او د نورو د ستراتیژیکو ګټو لپاره لوبېدل ځای نه لري.»
وروستي دوه بریدونه چې مسوولیت یې د داعش خراسان څانګې منلی، یو یې د مې مياشتې پر ۱۷باميانو ولایت کې پر بهرنیو سیلانيانو وشو او دویم هغه برید و چې په کابل کې د فرمانونو او حکمونو د تعقیب او نظارت لوی ریاست پر کارکوونکو وشو چې له لسو زياتو کسانو ته په کې مرګ ژوبله واوښته.
اوونۍ وړاندې د اسلامي امارت ځواکونو د یادو بریدونو عاملین په جلا عملیاتو کې ونیول چې ځينې یې بهرني اتباع دي.
د اسلامي امارت وياند مولوي ذبیح الله مجاهد وايي: « اوس د داعش خراسان څانګې پاتې مشران او غړي د ځینو استخباراتي سازمانونو په مرسته بلوچستان او خیبر پښتونخوا ته نقل شوي او هلته مرکزونه او روزنیز کمپونه لري. په افغانستان او نورو هېوادونو کې له دې نویو مرکزونو بریدونه ترسره شوي او هم په بلوچستان او خیبرپښتونخوا کې دیني علماء کرام او د دیني، مذهبي او سیاسي جماعتونو غړي په نښه کوي او د ځینو کړیو له لوري ترې په شومو اهدافو کې کار اخیستل کېږي.»
دا په داسې حال کې ده چې له تېرو درېیو کالو راهیسې پاکستان او ځينې نور هېوادونه اندېښنه لري او تور لګوي چې په افغانستان کې ترهګرې ډلې فعالیت لري او د افغانستان خاوره د دوی پرضد کارول کیږي.
خو اسلامي امارت تل نړۍ او د سیمې هېوادونو ته ډاډ ورکړی چې له افغان خاورې هېڅ هېواد ته ګواښ نه شته او په دې تړاو ادعاوې بې اساسه دي.
