د مسليم ليګ ن ګوند پر مشرۍ په پاکستان کې د اوسني حکومت خلاف د تحريک انصاف ګوند لاريونونو په دې هېواد کې سياسي فضا خړه کړې او په داسې حال کې چې دغه هېواد د شانګهای سازمان د ناستې کوربه توب ته چمتووالی نيسي، ورسره هم مهاله له فرصت په ګټنې د تحريک انصاف ګوند او د پخواني لومړي وزير عمران خان پلويانو هم حکومت ضد لاريونونو ته زور ورکړی.
له دې سربېره، پاکستان کې د ناامنیو زیاتېدو او د پښتون ژغورنې غورځنګ پر فعاليتونو بنديزهم هلته د سیاسي بې ثباتۍ پر اور تېل پاشلي او له همدې کبله د افغانستان سرپرست حکومت اړ شوی څو د وضعيت په اړه اندېښنه وښيي.
د اسلامي امارت د بهرنيو چارو وزارت څخه په خپره شوې اعلامیه کې ویل شوي، پاکستان دې د خلکو مشروع حقونه ومني او روانه بې ثباتي دې مهار کړي؛ ځکه په خبره يې دغه بې ثباتي له پاکستان سربېره پر سيمې هم اغېز کولی شي.
د اعلامیې یوه برخه: « په ګاونډي پاکستان کې د حکومت او سیاسي مخالفينو د پلويانو ترمنځ ترينګلتيا د اندېښنې وړ کچې ته رسېدلې او دوام يې پر ټوله سيمه منفي اغېز کولی شي. د ولس مشروع غوښتنو پر وړاندې تر ټولو ښه لار مذاکره او تفاهم دی. وروستيو پېښو ثابته کړې چې له مذاکراتو انکار ستونزې لا پېچلې کوي. موږ د پاکستان وضعیت له نږدې څارو. هيله من يو چې د پاکستان حکومت او تأثيرګذاره ادارې له زياتېدونکې نارضايتۍ سره معقول او واقعبین چلن وکړي.»
د پاکستان بهرنيو چارو وزارت د اسلامي امارت غوښتنو ته تند غبرګون ښودلی او دا يې د پاکستان په داخلي چارو کې ښکاره لاسوهنه بللې.
د یاد وزارت ویاندې ممتاز زهرا بلوچ ویلي، کابل دې په اسلام آباد کې یوه ډيموکراټيک دولت ته د مشورې ورکولو پر ځای خپلې داخلي ستونزې حل کړي.
هغې زیاته کړې: « پاکستان د طالبانو بهرنیو چارو وزارت د ویاند اعلامیه د پاکستان په کورنیو چارو کې لاسوهنه بولي او دا اسلام آباد ته د منلو وړ څرګندونې نه دي. طالبان دې ټول شموله حکومت ته لومړیتوب ورکړي او د خپلو خلکو اړتیاوو او هیلو ته دې ځواب ووایي او دغه راز دې ښځو او نجونو ته د کار او زده کړو حق ورکړي.»
د سیاسي چارو کارپوهان وایي، پاکستان د خپلو غلطو پالیسو په غوره کولو سره خپل سیاسي او اقتصادي ثبات ته سخت زیان رسولی.
دوی غوښتنه کوي چې پاکستان دې د خپلو وګړو مشروع غوښتونو ته هو ووايي او د ټولو قومونو حقونو ته دې یو شان پاملرنه وکړي.
د سیاسي چارو کارپوه ادریس محمدي ځاځی وايي: « په پاکستان کې روانې ناندرۍ او سیاسي بې ثباتۍ د پاکستان د هغو ناسمو پالیسیو پایله ده چې په تېرو څلوېښتو کالو کې یې په داخل او ګاونډ کې کارولې ده.»
ځېنې نور بیا وايي، په اسلام آباد کې د سیاسي بې ثباتۍ زیاتېدل به له افغانستان سره د دې هېواد سوداګري هم اغېزمنه کړي.
د دوی په خبره، پاکستاني چارواکي د نړيوالو سټېجونو له لارې د افغانستان ناسم انځور وړاندې کولو هڅه کوي.
د سیاسي چارو کارپوه ظاهر بهاند وايي: « په پروني لارو کې شاوخوا ۱۶۵ افغانان د پاکستان د پوځ له خوا نیول شوي او لاهم لادرک دي. زما په اند، که په پاکستان کې لاریونونه او بې ثباتې همداسې روانه وي، د خلکو او حکومت ترمنځ به واټن لا پسې پراخ شي.»
دا په داسې حال کې ده چې د پاکستان د کورنیو چارو وزارت وړمه ورځ د یوې اعلامیه په خپرولو سره د پښتون ژغورنې غورځنګ پر فعالیتونو بندیز لګولی.
د غورځنګ مشر منظور احمد پښتین ویلي، د پاکستان فډرالي حکومت له دې اعلان سره د پښتنو پر وړاندې د دوښمنۍ ټولې پولې ماتې کړې او دوی به له هر ډول ستونزو سربېره خپلو فعالیتونو ته ادامه ورکوي، ان که د سر په بیه وي.
